Desde Diamars no a mira e Crocodil mas na Bonaire

Kier gara e Crocodil bibo y kizas mande Hulanda

KRALENDIJK: Tin par di dia caba cu esnan buscando e Crocodil na Bonaire, no ta mire mas! Gezaghebber di Bonaire a indica cu tin un experto cu a yega Bonaire, kende hunto cu STINAPA ta activo na e beach di Sorobon pa purba captura e Crocodil.  Experto aki a analisa e reptil basa riba su comportacion, a traha riba un strategia pa spot e animal.  Ta usando camera y drone pa trata na localiz’e.

   E meta ta pa gara e animal bibo.  Pero toch tur instancia cu tin e armanan necesario cu por haci e trabao, ta riba un standby si dado caso tin di bay mas leu.

   Sinembargo desde Diamars anochi nan no a mire mas.  E pensamento ta cu kizas e Crocodil a haya suficiente cuminda, pues “a come bon” par di dia atras, y esey ta pone cu e no ta riba un buskeda di cuminda.  Pues awor cu barica yen, e por keda scondi pa un periodo largo sin cu bo ta hay’e pa mira.  E por hasta keda 30 dia of mas prome cu e bolbe sali busca cuminda.

   Intencion ta pa saca e Crocodil y no mate.  Nan kier gare bibo, y despues transporta esaki pa Hulanda.  LNV di Hulanda tambe a envolvi su mes, pa duna permiso pa captura e Crocodil.  Gezaghebber a dicidi cu seguridad ta na prome lugar, y e intencion primordial ta pa captura e reptil.

   Mientras tanto riba caya na Bonaire, ya caba por mira cu a cuminsa bende diferente T-Shirt di Crocodil di e isla y e interes pa cumpra nan ta basta grandi.  Cada uno costa diescinco Dollar, y ta indica “Wanted - Last seen in Sorobon Bonaire”.  Tambe tin uno di “Catch me if you can”.