Luenne Gomez-Pieters ta splica:
ORANJESTAD (AAN): Director di Departamento di Impuesto señora Luenne Gomez-Pieters den un entrevista recien cu DIARIO a splica di Expatregeling enfatisando cu e regulacion aki, cu e beneficionan fiscal, awor ta conta tanto pa esnan cu a nace como pa esnan cu no a nace na Aruba.
Señora Gomez-Pieters a duna di conoce cu e expatregeling den principio tabata skirbi pa asina Aruba atrae expertonan, cu tabata biba afo y no a nace na Aruba, bin traha na Aruba cu nan conocemento y experticio ora cu no tabata tin expertonan local. Un ehempel di esaki ta pa cierto posicionnan den e refineria y den e sector hotelero.
E ley aki, recientemente a keda adapta pa asina esnan cu a nace na Aruba y a bay studia afo, tambe por haya e mesun beneficionan fiscal como un expatriate. Cu e ley aki, no tin descriminacion entre un expatriate cu a nace, y semper a studia y biba afo y un expatriate cu a nace na Aruba, bay studia afo y bin bek Aruba pa aplica su conocemento y experticio. Pa esaki, e persona mester tin un minimal HBO opleiding y 5 aña di experiencia.
E proceso mester wordo inicia pa e doño di trabao y a base di e regulacion, tin un termino pa mantene su mes na dje. E mester entrega e peticion dentro di 4 luna despues cu e profesional a cuminsa traha. Esaki ta un derecho cu e profesionalnan tin y por haci un apelacion na nan doño di trabao pa ricibi e beneficionan fiscal, esta liber di impuesto.
“Tin hopi regulacionnan, leynan cu ta regla compensacionnan cu no ta carga impuesto. Tin hopi beneficio fiscal den e regulacion aki cu un doño di trabao por haci uzo di dje pa asina atrae un professional bin Aruba pa traha den su negoshi”, Señora Gomez-Pieters a duna di conoce.
