ORANJESTAD (AAN): Un publicacion cu a hala atencion ta esun cu riba Facebook un grupo di bar, nightclub y restaurantnan uni a realisa den e ultimo oranan.
E publicacion ta bisa (traduci for di ingles): Ban hacie hunto!!! Despues di por a bida un luna den libertad, nos tur ta feliz, pero ta bin un aumento di e casonan y mester tin hopi cuidao. Pesey kier pidi tur hende na Aruba pa vacuna pa asina por ta mas safe y por sigui mantene e libertad y e felicidad! Nos mester traha hunto of nos tur lo perde na final!!
Nos no kier yega na e punto unda solamente ta bay permiti personanan vacuna, pero lo yega na esey si nos no ta actua hunto. Pesey ban haci e shot! Ban mantene safe nos tur! Esaki ta e mensahe cu un di e miembronan di e grupo di bar, nightclub y restaurantnan uni a emiti. Mester remarca cu na Merca, ya caba na estadonan manera New York y Florida comercio a cuminsa duna gobierno y e organisacionnan di salud un man pa asina yuda combati Covid door di pidi certificado di vacunacion na esnan cu kier drenta of participa den cierto actividadnan.
Aunke Prome Minister Evelyn Wever-Croes a bisa diahuebs den conferencia di prensa cu Aruba no ta asina leu di obliga tur hende pa presenta un carchi di vacunacion pa ingresa por ehempel den restaurantnan of barnan, por bisa cu si comercio uni manera por a mira den e publicacion aki, e unico personanan afecta lo ta esnan no vacuna, pasobra nan lo cuminsa keda exclui di por ta parti di un sociedad cu si kier progresa, cu si a vacuna y cu kier combati Covid. Si comercio uni, e imposicion di medidanan no lo keda solamente den man di gobierno, y di e forma aki esnan cu no ta vacuna lo cuminsa bira un grupo minoritario y exclui den e comunidad.
