Rulienne Arends, Trahador Preventivo di FADA:
Rulienne Arends, Trahador Preventivo di Fundacion Anti Droga Aruba (FADA), siguiendo cu e tema di vaping, ta opina cu e advertencianan riba uzo di esaki a cuminza hopi laat caba, pasobra hopi hoben ta haciendo uzo di dje caba.
El a menciona cu e compania cu a produci e vape aki, tin demanda tras di demanda aworaki, contra nan; y nan mester a paga miyones di placa door di esaki. Tin varios lugar na Merca cu e consumidor no por haya vape mas, di e forma legal, pero toch na banda ta keda haya cierto lugarnan cu ta keda vende vape cu tin holo y tin smak, anto den e caso aki ta bay den e parti sintetico y bo no sa kico tur ta wordo uza pa crea e vaping pasobra pa hopi tempo, ta esnan cu no tin holo ni sabor, legalmente por wordo bendi. “Aki na Aruba, e productonan aki nos no sa ki dia ta cuminza yega, pero naturalmente ta di suma importancia si, pasobra nos ta wak e peligro. Mayoria hoben ta uza esaki (vaping cu holo y smak agradabel), pasobra e ta accesible, pero ora cu ta bin e cambio, nos ta bay wak con e uzo ta cay), Rulienne Arends a trece dilanti.
Rulienne ta kere cu na momento cu e leynan bira un poco mas fuerte, y ta bin control, e lo yuda pero tin e riesgo toch cu e hobennan lo sigui us’e.
El a subraya cu tur dos sorto ta preocupante y ta peligroso, y tanten cu nos hobennan no mira e peligro, e ta bira dificil anto hopi factor ta hunga un rol.
“Nos di FADA ta bin, for di e aña escolar anterior (2022-2023), a cuminza cu e tema di vaping su so, pasobra semper tabata tey pero den humamento den e caso aki, y e aña escolar anterior a bira un topico riba su mes cu nos ta dunando. Y bo ta keda scucha diferente factor cu ta hunga un rol” Arends a subraya.
El a agrega cu ta mescos cu alcohol. FADA por keda brinda nan tur e informacion necesario, tur e peligronan, casonan cu ta pasando den bida real, pero na final di dia ta keda na nan responsabilidad pa tuma un miho decision. “Y di otro banda, na cas nan ta bisa ‘ok, bo tin mag di vape, nos por duna cien biaha e informacion na e hobennan aki, pero si e ta permisible, e chens cu e ta bay haci’e ta hopi grandi”, Rulienne Arends a reitera.
