ORANJESTAD (AAN): Pastoral Hubenil Aruba y Parokia Santa Anna ta invita publico pa un Misa special.
Ta asina cu Pastoral Hubenil Aruba (PHA) conhuntamente cu parokia Sta. Anna na Noord, ta invita tur hoben y pueblo di Aruba en general pa un Santo Rosario sigui pa Santa Misa diamars 31 di October venidero na Kapel di Alto Vista.
Tanto e rosario y e santa misa ta na honor di Birgen di Santisimo Rosario, nos Birgen di Alto Vista, patrona di nos baranca stima.
Luna di october ta e luna di rosario y ki mas bunita pa nos clausura e luna aki cu dedicacion na nos Mama Maria cu advocacion di Birgen di Santisimo Rosario. Na entrada di kapel ta bay tin macuto pa haci donacion di comestibel y of producto pa esnan di menos recurso. Un y tur ta keda cordialmente invita pa asisti na Kapel di Alto Vista diamars 31 di october venidero y pa un y tur tene cuenta cu pa e diamars aki tin cambio di Orario: 6:00 pm Santo Rosario pa hobennan // 6:30 pm: Santo Sacrificio di Misa.
