Derechonan di mucha ta hunga rol importante den programanan di Universidad di Aruba

Rector suplente:

ORANJESTAD (AAN): Diaranzon mainta na Universidad di Aruba (UA) a tuma lugar un rueda di prensa relaciona cu e asina yama Codigo di Proteccion Profesional.

“Tur mucha cu bira victima di abuso ta un dimas, pues cada mucha ta conta”, ta locual Ruth Bonnevalle-Kok,  Rector suplente di UA y Decano di facultad di Derechonan, a cuminza bisa durante e conferencia di prensa.

El a splica cu tur cos a wordo organiza pa investigador y docente di Universidad Clementia Eugene.

Esaki den cooperacion cu profesionalnan den cuido di mucha, Departamento di Asuntonan Social, ministerio di Asuntonan Social y Husticia, Bureau Slachtofferhulp Codigo Penal.

Segun Kok, UA ta hopi contento cu señora Eugene a organiza e conferencia di prensa.

“Cu esaki Clementia ta saca un man pa nos muchanan, door di percura cu e tema importante aki wordo papia di dje na UA”.

Como instituto primario di enseñanza y estudio na Aruba, Universidad di Aruba por hunga un rol activo den e tema asina importante aki, segun e Rector suplente.

El a sigui bisa cu e derechonan di mucha ta hunga un rol importante den tur e programanan di Universidad, incluyendo den e facultad di Derechonan.

“Den e facultad aki nos ta ofrece lesnan den criminologia y derechonan humano, mientras cu studiantenan ta skirbi scriptie riba abuso di mucha y kico tur por wordo haci contra esaki”.

Nos studiantenan ta haya un opleiding cu esaki inclui den dje, pa asina bira profesionalnan critico den area di Caribe, unda cu e derechonan di mucha tambe mester bin dilanti, segun Kok.

El a sigui bisa cu mirando esaki UA ta e plataforma unda cu tur partido ta drenta den un dialogo, ta laga nan mes wordo inspira pa e docentenan, e studiantenan y e profesionalnan, unda cu e importancia di traha hunto ta resalta.

E intencion ta pa traha den futuro riba un meta comun, cu ta proteccion di mucha.

Mirando cu un investigacion cientifico ta bay tuma lugar, e Rector suplente a desea tur cu ta bay participa na esaki hopi exito y un cooperacion fructifero pa futuro.