Envez di suta cu BTW...
ORANJESTAD (AAN): Desde algun luna pasa caba, a bin ta nota cu Gobierno ta mustra cu lo bay introduci e impuesto di BTW pa yuda genera placa pa cubri e 90 miyon Florin cu Gobierno tin mester.
Frans Ponson di Comerciantenan Uni a declara cu den recien reunion cu Gobierno, nan tambe a brainstorm hunto, y a pone riba papel algun idea fenomenal cu por duna un forma alternativo pa genera 90 miyon Florin. Trece placa den caha, sin cu ta strangula pueblo cu e impuesto di BTW riba lomba di e clase trahador.
“Gremionan tin e ideanan aki poni riba papel, y tin forma pa genera e placa ey,” Ponson a bisa. Uno di nan cu el a menciona ta cu a yega momento pa cobra impuesto riba tur Airbnb cu tin na Aruba, cu ta ganando placa sin paga nan fair-share na e isla.
“Bay cobra e hendenan ey cu ta ganado placa! No bin riba e ciudadanonan cu ta pagando caba, y abusa di dje! Pasobra e ta bay bira un punto impagable.”
E representante di Comerciantenan Uni a splica cu tin manera alternativa, y si tanto Gremio cu Gobierno traha hunto, por bay saca e 90 miyon Florin aki for di diferente caminda, sin cu e ta bay subi prijs y inflacion riba lomba di pueblo cu e BTW feroz ey.
E plan tambe pa cuminza cobra extra impuesto tur caminda (incluyendo Aeropuerto, etc.) ta un idea cu Comerciantenan no ta kere lo bay ta e solucion pa Aruba, y ta facil pa gara 100 miyon Florin mes di pueblo!
Ponson a finaliza bisando: “E pregunta e ora ta: E 100 miyon Florin ey ta pagable pa nan?”
