Derame di azeta na refineria El Palito na Venezuela no ta representa un menasa pa Aruba

Rene Ridderstaat di CMO:

ORANJESTAD (AAN):   Rene Ridderstaat di Oficina Maneho di Crisis (Crisis Management Office Aruba) cu antes ta conoci como Bureau Rampenbestrijding, ta papia riba e situacion di derame di azeta y demas sushi cu a wordo constata na e beach dilanti refineria di El Palito, na Puerto Cabello na Venezuela.

            E situacion aki a trece cu ne un estado di preocupacion riba un posibel efecto pa Aruba. Ridderstaat a duna di conoce cu despues cu a ricibi informacion cu tabata tin un derame di azeta na Venezuela, CMO a sigui monitor e situacion aki y a evalua con grave esaki ta, risico y menasanan pa Aruba.

            El a sigui bisa cu e menasa aki no ta conta pa Aruba. Tambe CMO a contact METEO ya cu nan ta monitor stroom y pa wak con e situacion lo ta pa cu Aruba y si tin cambio di stroom si lo por tin efecto pa e isla.

            Te cu awor tur cos ta faborabel pa Aruba ya cu no tin e menasa di biento. Toch ta sigui den e proceso di monitor y lo wak den e proximo dianan ki consecuencianan lo por tin pa Aruba.

            Rene Ridderstaat a laga cu a informa Prome Minister Evelyn Wever-Croes riba e situacion. Hopi informacion directamente for di Venezuela no a ricibi, pero asina mes ta sigui busca e manera pa haya e informacion pertinente y oficial riba e trabao cu ta wordo haci na Puerto Cabello.

            Loke por a constata riba medionan social ta cu tabata tin basta daño den cierto beachnan na Venezuela y esaki ta trece un situacion fastioso y Aruba ta keda por monitor esaki debidamente, a remarca.

            Si stroom ta keda manera aworaki di oost pa west no lo tin ningun menasa pa Aruba. Solamente si e stroom cambia di noord-west, e ora e por tin efecto. Pero te aworaki tur cos ta mustra pa e proximo oranan cu no ta bay tin cambio den esaki.

            Den caso cu lo tin cualkier cambio, CMO lo informa na tempo mirando cu e miembronan di Crisis Team tambe a wordo poni na altura. Den caso cu yega asina leu, cu ta resulta cu e por ta un menasa, lo activa esaki mesora, Ridderstaat a indica.

            Banda di esaki a informa e otro islanan cu ta parti di Reino Hulandes riba e situacion y nan tambe lo ta monitor y lo keda intercambia informacion.

            Finalmente, CMO ta enfatisa cu e derame na Venezuela no ta representa un menasa pa Aruba.