Realidad mundial ta haci Aruba e pais mihor goberna den Reino
*Cuadro di honor pa trahadornan den seguridad nacional y rescate
*E reto di Husticia pa 2024 ta pone fin na abuso sexual di mucha
ORANJESTAD (AAN) — Kico futuro lo trece, ta e pregunta mas grandi cu ta wordo haci riba tur tereno riba plataforma internacional pero sigur den Reino Hulandes, cu ta drenta un epoca nobo di cambionan grandi cu e Pueblo di Hulanda a exigi den ultimo eleccion.
Cambio ta e palabra cu no solamente ta resona na Hulanda, pero rond mundo, cu indicenan claro cu 2024 lo trece suspenso no solamente como aña bisiesto, schrikkeljaar, cu lo conta cu un dia mas.
Kico ta e mundo cu ta rondona Aruba y kico ta spera Aruba den e temporada nobo nos dilanti?
Loke ta spera mundo ta depende di dirigentenan mundial, pero tambe di e placa cu lo tin den circulacion pa entrega hende alimento pero tambe pa produci mas arma pa guera, manera na Ukraine y Medio Oriente.
Dilanti costa di Aruba tin e pais Venezuela, cu na 2024 lo tin un eleccion. Un Presidente nobo lo asumi poder na 2025 y asina causa despedida di Nicolas Maduro?
Dificil pa bisa si tene na consideracion, cu Venezuela por bira e pais cu ta entrega petroleo na cantidad di pais na mundo y hasta kita cliente for di Rusia, cu ta aliado grandi di Venezuela.
E hecho cu mundo mester di petroleo, por duna e sosten cu Nicolas Maduro mester pa keda na poder aunke tanto pais ta predente cu nan no kier mira Nicolas Maduro na poder.
Loke 2023 no a logra ta, deshaci di petroleo como poder mundial. Hasta e Conferencia di Clima, di cual bienestar directo di hende y mundo ta depende, no a logra yega na e decisionnan clave cu mundo a pretende di lo introduci pa scapa clima di cual hende ta depende, di e peligernan grandi cu cambio di clima ta representa pa e ser humano.
Peligro cu ta bini dilanti den e pronosticonan pa temporada di horcan pa 2024, cu ta wordo ya pronostica di lo produci un cantidad mas cu normal di actividad di horcan, cu a haci cu na 2023 mester a subi e cifranan original di e temporada, cu a duna prueba cu horcan no conoce frontera.
E pais mas grandi di Reino Hulandes, Hulanda, sigur ta prueba di loke ta biba rond mundo cu pueblonan cu kier pan, cas, trankilidad pa nan por biba cu resultado di nan trabou.
E Gobierno Hulandes nobo lo mester pone un fin na e crecemento importante di pobresa na Hulanda, no solamente e pais mas rico den Reino pero tambe uno di e paisnan mas rico na henter mundo.
Problemanan serio a manifesta nan mes den Reino, cu na 2023 mester corona Aruba como e pais mihor goberna den Reino.
Prome Ministro Evelyn Wever-Croes y e team di su Gobierno, a score den Reino Hulandes na prome lugar cu construccion di un base financiero y economico solido pa Aruba.
Mientras medidanan di austeridad ta bira realidad na tanto pais y sigur lo bati na porta di Hulanda tambe, Gobierno Wever-Croes a anuncia decisionnan cu ta duna sosten na esnan mas debil den comunidad.
Con atractivo Aruba a bira como pais, sigur ta bini dilanti den e forma cu costa di Aruba, a bira horizonte di un bida prometedor nobo pa habitantenan di paisnan grandi den region, cu no por entrega na nan hendenan loke Gobierno Evelyn Wever-Croes ta entrega na Pueblo di Aruba.
E realidad aki a haci cu Aruba ta wordo considera como un paraiso y un pais di oportunidad nobo pa personanan, cu ta pone nan bida na riesgo pa yega costa di Aruba y den hopi caso ta acepta pa transporta droga den barconan cu ta kibra dilanti costa di Aruba.
Na final di 2023, Aruba mester aplaudi e tremendo labor di Arubianonan cu ta pone nan bida na riesgo pa cumpli cu nan trabou pa enfrenta peliger grandi pa defende Aruba. Nan ta modelo pa e Arubiano, cu ta enfrenta tur reto pa cumpli cu su pais.
Na final di 2023, sigur mester reconoce e trahadornan cu mester pone nan propio bida na peliger pa rescata hende cu ta enfrenta e laman bruto na costa Norte di Aruba y pa defende e seguridad nacional di Aruba.
Hopi trabou ta spera Aruba ainda, pero loke sigur ta resalta den exigencianan di mañan, ta cambio di leynan cu mester proteha mucha inocente di abuso sexual y fisico di cual nan ta victima.
Den esaki sigur mester revisa tur loke ta habri porta pa e horor grandi cu muchanan ta enfrenta den violencia y abuso sexual di menor di edad.
Mientras pagara ta anuncia cu 2023 ta despedi y 2024 ta bati na porta, e momento ta yega tambe pa nos yama danki pa enorme sosten cu nos a ricibi pa haci nos trabou.
Bendicion di Todopoderoso nos ta pidi pa Aruba, cu cuarenta aña despues di a habri porta oficialmente pa Status Aparte, awe dirigi pa Gabinete Evelyn Wever-Croes, ta entrega Reino e modelo con ta transforma un pais cu Reino a declara bancarota, den un modelo di gobernacion pa Reino Hulandes!
