Ola Tropical Activo lo pasa cerca di Aruba
ORANJESTAD (AAN): Un alerta pa mal tempo ta drentando na vigor pa Aruba, for di Diahuebs 6 October 2022 for di 6:00 am, te cu Diasabra 8 October 2022 pa 12:00 pm.
Departamento DMA a indica cu periodonan cu awacero di varios intensidad ta worde spera di mainta trempan 6 di October te Diasabra 8 di October, riba Aruba y cercania ora un Ola Tropical activo cruza den nos region bayendo west.
Si acaso e sistema aki desaroya mas of no... toch e lo trece un chance halto pa awacero modera te pisa localmente cu por trece cantidadnan di 25 te 45 mm durante e periodo ey.
Bientonan di 50 te 60 km/h por worde spera den rafaga, especialmente den awacero modera te pisa cu lamper y strena. Awacero modera te pisa por causa molester na cierto partinan.
Condicionan Maritimo: Lama por bira bastante bruto te bruto principalmente na partinan di costa oost te noordwest y lama temporalmente agita na parti zuid y partinan proteje. Un aviso pa boto chikito lo drenta vigor 6:00 am, Diahuebs, pa especialmente partinan oost te noordwest di costa y tambe pa lama habri. Na operadornan di boto chikito ta bay un advertencia pa no aventura cerca di areanan
cu awacero of lamper cu strena.
Resumen: Pa e dianan aki ta spera 25 te 45 mm di awacero. Tambe un aviso pa boto chikito lo drenta ta na vigor 6:00 am Diahuebs, especialmente pa partinan di costa oost te noordwest y lama habri. Operadornan di boto chikito ta worde suplica pa evita areanan di awacero y lamper cu strena.
Centro di maltempo: Diaranson atardi 4:00 pm, e centro di e Ola Tropical aki tabata net panort di Isla de Margarita (Venezuela), na 11.3º Nort y 63.8º West. Si e sigui move west cu mesun 27 km/h, e centro lo yega banda di Aruba riba Diahuebs atardi. Pero corda cu e cobertura di nubia ta asina grandi, y cu tempo lo deteriora desde oranan di mainta caba.
Segun National Hurricane Center, e Ola Tropical aki a keda mescos compara cu Diamars, pues e no a bira nada mihor organiza. Pero biento di nivelnan mas halto lo por bay pone bira mas faborable pa haya mas forza. Pero e problema ta cu semper na e costa panort di Venezuela, e maltemponan aki ta confronta e seronan halto cu ta stroba su formamento.
Aki por mira imagen di satelite di Diaranson atardi 4:00 pm.
