*DOW su ekipo ta prepara pa atende cualkier eventualidad
ORANJESTAD (AAN): Ing. Marlon Croes, director di DOW a indica cu nan ta spera entre 25 pa 45 milimeter di awa y considerando cu nos a pasa den tormenta Bonnie algun siman atras, cu a laga 38 milimeter di awa y siman pasa a registra 37 milimeter di awa. Ekipo di DOW a handle e consecuencianan di Bonnie hopi bon, e di dos tabatin cierto area cu a experencia inundacion, pasobra e tera ta satura y esaki ta nifica cu cualkier awacero por duna DOW un tiki dolor di cabes.
Segun Croes, sigur e fluho di trafico lo wordo afecta y esaki lo causa retraso. Awa lo tarda mas pa yega lama, y e ta pidi consideracion di automobilistanan y dunador di trabao pa tin comprension riba esaki.
Den oranan di atardi, nan a repasa nan 'check list' pa percura pa e puntonan debil den infraestructura pa nan por moviliza hopi lihe pa cera caminda cu baricada y pa pomp e awa.
Nan tambe a tuma cierto precaucionnan, pa cierto casnan cu ta yena cu awa pa asina minimaliza e riesgo cu nan lo yena cu awa.
DOW su ekipo ta prepara pa atende cualkier problema despues di e paso di e sistema pa nan por clear e careteranan, mescos cu nan a haci e weekend cu a pasa, na unda nan a kita santo for di caminda. Nan lo percura pa pomp e awa de areanan inunda y haci e camindanan limpi, pa asina por restaura operacionnan diario mas pronto cu ta posible.
