Parlamento di Aruba tin un deber na atende haltura di castigo
*Sentencia di Corte di Husticia a causa ola di reaccion publico
*Ley ta otorga un lugar di control na un “leerplicht ambtenaar”
ORANJESTAD(AAN)—E sentencia di Corte di Husticia den e caso di abuso di un menor di edad, a ricibi reaccion publico fuerte ayera den comunidad.
“Ora nos repasa nos leynan penal, nos ta mira cu nan ta basa riba proteccion di personanan cu ta bira victima di otro ciudadanonan cu ta kibra leynan importante pero tambe ta causa destruccion di e bienestar di otro ciudadano,” a bini dilanti den un reaccion.
Central den e reaccionnan cu a wordo ricibi tabata e hecho cu un señal robez ta wordo manda pa personanan cu ta abusa di e confiansa cu hende mester por pone den nan, a base di e funcion cu nan ta ocupa.
“Orden di Ley ta e forma cu e ta regla e conducta general di ciudadanonan cu mester abstene nan mes di abuso di otro persona. Ley ta proteha e hende contra abuso di cualkier indole na cualkier forma,” a bini dilanti.
E caso aki ta trata di un menor di edad, cu manera Huez mes a trece dilanti, cu a bira victima di abuso sexual cu tur resultado cu esaki tin pa su persona.
“Su bida a wordo afecta na un forma serio,” a bini dilanti.
E acusado P. A ta un coach di futbol di Brazil Jrs., caminda e tin contacto cu hobennan mescos cu den su trabou como Leerplitcht Ambtenaar, cu ley ta entrega un papel importante pa defende e bienestar di mucha y hoben den comunidad.
Den su sentencia Corte di Husticia a yega na e conclusion cu ta reduci e castigo cu Corte den Prome Instancia a impone riba e acusado, cu lo mester a keda cuatro aña den prison pero awor lo tin un castigo reduci na tres aña.
E punto hopi importante den e reaccionnan tabata e hecho cu e acusado, cu segun Corte di Husticia a comete e acto castigabel, por sigui haci su trabou como “leerplicht ambtenaar”, cu segun ley mester controla si muchanan ta bay school y tin derecho di actua contra mucha y nan mayor si esaki no ta e caso.
“Ta trata aki di un funcion den cual e integridad di e funcionario ta sumamente ncesario ya cu pa cumpli cu su trabou e ta ricibi tur informacion di hobennan cu mester bay school y nan famia,” informantenan cu DIARIO a acerca a base di e reaccionnan fuerte, a trece dilanti.
A wordo mustra cu e funcion di leerplicht ambtenaar mester wordo ocupa dor di un persona cu merece confiansa total.
Informantenan a indica na DIARIO cu e caso aki a duna prueba cu Parlamento di Aruba mester reuni y mester bini cu sancionnan fuerte contra abuso di mucha y hende en general.
“Base di Ley na un pais democratico ta, cu ta proteha e hende contra abuso di cualkier forma. Sigur den caso di hobennan, ley mester ta sumamentye fuerte,” a bini dilanti.
Segun informantenan awor Parlamento di Aruba mester actua y mester atende e asunto aki pa mira con ta aumenta e castigo y e resultado cu abuso di muchanan sigur dor di personanan den e funcionnan aki, tin pa personanan cu a haci nan mes culpabel di e actonan aki.
“Con den e Codigo Penal di Aruba ta pone mas acento riba abuso di funcion? E Codigo Penal di Aruba ta coresponde cu tur abuso contra mucha cu mas y mas ta bira realidad awor cu abusadornan ta uza metodonan moderno pa crea mas victima?”
Informantenan clave di DIARIO ta di opinion cu esaki ta uno di e topiconan cu mester di prioridad di Parlamento di Aruba cu mester dedica atencion na desaroyonan riba tereno di abuso di menornan di edad den un mundo cu nan ta core mas riesgo dor di metodonan nobo cu abusadornan tin na nan disposicion pa gara nan victimanan.
