ORANJESTAD (AAN): Ora cu Gobierno Hulandes a cay e siman aki,
Geert Wilder di Partido PVV a duna ordo pa tur su Ministronan y tambe Secretarionan di Estado tuma retiro. Nada di cuenta di sigui traha estilo Demisionario.
Pero riba peticion di Rey Willem-Alexander, a pidi demas Ministronan pa keda funciona demisionario te ora cu eleccion y un Gobierno nobo sinta.
Esey nifica cu Zsolt Szabó di PVV ta out y no tin e cartera mas di Secretario di Estado di Relacionnan di Reino
Y awor na su lugar, ta señora Ministro Uitermark di Asuntonan Interior y Relacion di Reino, temporalmente lo bay tuma over e cartera di Szabó di ‘Digitaliseering en Koninkrijksrelaties’.
Den su prome declaracion despues cu Gobierno na Den Haag a cay, Zsolt Szabó a indica cu e ta tiki desapunta cu e no a logra termina su trabao, pero toch ta wak bek atras cu orguyo na e resultadonan cu el a logra.
No obstante, e ta subraya cu pasonan importante a ser haci. “Mi ta orguyoso cu tin algun fundeshi laga atras pa asina mi sucesor por traha riba dje. Den e aspecto di Relacionnan di Reino, mi a comprometi mi mes cu e good governance, solidez di finanzas publico, y sostenibilidad. Mi filosofia semper a centraliza riba un mihor futuro pa e habitantenan di e parti Caribense di nos Reino”.
