Aruba Tourism Authority y Aruba Ports Authority NV ta yama bonbini na e barco “Brilliant Lady”

ORANJESTAD (AAN): Aruba a yama cu orguyo bonbini na Brilliant Lady, e barco nobo pa adulto di Virgin Voyages,

marcando un momento importante pa e sector di turismo crucero di nos isla. E yegada ta coincidi tambe cu e cuminsamento oficial di temporada di Carnaval di Aruba, un di e celebracionan cultural mas anticipa di nos isla.

E ocasion historico a tuma lugar den presencia di un delegacion distingui representando e sector di turismo y waf di Aruba, incluyendo, Minister di Turismo, Transporte y Labor, mr. Wendrick Cicilia, Ronella Croes, CEO di Aruba Tourism Authority (A.T.A.), y Marc Figaroa, CEO di Aruba Ports Authority NV (APA NV).

Brilliant Lady ta e di cuater barco di Virgin Voyages, hunto cu Scarlet Lady, Valiant Lady, y Resilient Lady. E barco ta transporta aproximadamente 2,770 pasaheronan y 1,150 miembro di tripulacion.