Na Lago Como net dilanti villa Viale Geno
- Julina de Lannoy di 32 aña ta bibando na Hulanda
ORANJESTAD (AAN): Un tragedia a socede riba Diasabra atardi, 12 di Juli den awanan di ‘Lago Como’, dilanti di Viale Geno. E villa ta situa como 1 km panort di ciudad di Como, cu ta di provincia Como cu ta hopi cerca di frontera cu Suisa. E ciudad Italiano di mas cerca ta Milan cu ta situa como 40 km mas pazuid.
Constata morto: Alrededor di 3:55 pm (cu ta 9:55 am ora di Aruba), personal di Search and Rescue a rescata e victima femenino di 32 aña di edad. A detecta cu e victima a sufri un paro cardiaco, y despues di e prome intentonan di practica CPR riba dje, e victima a wordo hiba cu maximo urgencia den e ruta di 15 minuut pa yega Ospedale Sant’Anna.
Durante e transport, a keda practica CPR pa purba rebiba e dama. Na su yegada, Docternan na e hospital a constata cu el a drenta sin señal vital y no por haci nada mas. Asina Docter a constata morto di e dama Julina Janique de Lannoy, naci na Aruba dia 6 di October 1992, pues tin 32 aña di edad.
E accident mes: Testigonan a splica cu dos boto tabata envolvi, y uno di nan tabata gehuur, y abordo di esey tabatin turistanan di nacionalidad Hulandes. Julina tabata abordo hunto cu cinco amigo. Detaye exacto ta wordo investiga ora cu e dos botonan aki a dal den otro. Debi na e impacto, e victima Julina door di e momentum, a perde ekilibrio y a cay den awa y a bay dal den e chapaleta di e mesun boto di huur. E persona den e boto mesora a stop esaki, y desesperadamente a trata na rebiba e dama victima.
E temporada aki e area aki dilanti Viale Geno ta yen di boto riba e lago aki. Pero ora cu alarma a wordo bati, personal di Guardia Financiero, Warda di Polis, Polis local, y Cuerpo di Bombero di Como a bay duna un man. Pero tambe a mira e boto di emergencia di Cruz Cora di Lecco, dos Ambulance avanza di rescate a yega, tambe un Ambulance basico, y Helicopter Rescue. Tur e accion aki a wordo coordina door di Centro di Operacion di Soreu Laghi.
Un herido mas: Tabatin un persona mas cu a wordo atendi pa herida, y esaki ta un homber di 44 aña di edad y e tabata riba e otro boto envolvi den e accident. Segun autoridad a confirma, e homber aki si no ta den estado critico.
Autoridadnan awor ta investigando y documentando e accident fatal aki riba Lago, pa cuidadosamente reconstrui e dinamica di e accident, y asina indica kendenan ta responsabel.
Julina de Lannoy ta conoci na Aruba pa un persona cu gusta surf, y tambe ta stima animalnan. Recien el a contrae enlace matrimonial y a bay biba na Hulanda.
Na famia di e fayecida, DIARIO ta extende su mas profundo palabra di condolencia.
