ORANJESTAD (AAN): Departamento di Impuesto ta un departamento di gobierno cu tin e tarea pa garantisa entrada di impuesto y pa facilita e contribuyente pa por cumpli cu su debernan fiscal.
E ta un tarea cu un responsabilidad grandi pa cu presupuesto di Pais Aruba y e presupuestonan di otro instancianan di gobierno manera ATA, TPEF, AZV, SVB, DIMAS y DIP.
Den e prome mita di aña 2022, Departamento di Impuesto a registra un total di 868 miyon florin na entrada. Di e suma aki, a colecta un total di 399 miyon florin (46%) na entrada di impuesto y 469 miyon florin (54%) na toeristenheffing, primanan di AOV/AWW y AZV, erfpachtscanon y entrada pa gasto di permiso di DIMAS, cualnan ta destina pa instancianan manera ATA, TPEF, AZV, SVB, DIMAS y DIP.
Entrada compara cu aña 2021
Compara cu otro añanan, e entradanan ta solamente 10% bou e nivel di entrada di aña 2019, e aña prome cu pandemia. Sinembargo compara cu aña 2021, a registra un aumento significativo di 30% den e entradanan di e prome mita (januari te cu juni) di aña 2022.
E entradanan di impuesto directo y indirecto a aumenta cu 37% compara cu e entradanan di e mesun periodo di aña 2021 y nan ta representa 58% di e presupuesto di Pais Aruba di aña 2022. E entradanan destina pa otro instancia a aumenta cu 24%. E aumento di e entrada total di e prome mita di aña 2022 ta 30% compara cu aña 2021.
