British Airways lo bay yuda Aruba pa kibra record di turismo di Reino Uni

Ronella Croes a mustra cu negociacionnan tabata intenso den ultimo 7 aña

ORANJESTAD (AAN): Despues di un periodo largo di negociacion, e noticia grandi e siman aki ta e hecho cu e gigante British Airways a duna luz berde pa haci vuelonan di Aruba direct pa London entrante Maart 2023.

   Aruba conoce turistanan Britanico ya desde 1997 caba, ora cu tabatin vuelo regular for di Reino Uni pa Aruba, y esey a bira posible danki na diferente aerolinea.  Na aña 1997 e isla aki a ricibi un total di 2.679 bishitante for di Reuni Uni.  Esaki a sigui crece, y na 2010 a ricibi un total di 14.502 bishitante.   Te cu 2017, Aruba a ricibi 19.201 bishitante, cu asina a bira e aña record pa e isla di bishitantenan di Reino Uni.  E momento ey, e turistanan Britanico aki a representa 21% di e turistanan cu a bishita Aruba.

   Pero awor ta e gigante British Airways mes ta bay cuminza bula!  Esaki ta pone cu e pronostico cu lo bay ricibi un total di 15.000 bishitante for di Reino Uni, y esaki lo pone cu lo bay nota un 38% di crecimento compara cu 2019, pues e aña normal di turismo prome cu pandemia.

   Esaki ta pone cu Aruba lo por bay mira e record di 2017 wordo kibra danki na British Airways.

   Ronella Croes di Aruba Tourism Authority a trece esaki dilanti, pa mustra con contento e ta cu e logro aki.  El a splica cu vuelonan awor di British Airways a bira posible, danki na varios aña di negociacion, tin biaha hopi ‘pisa’, no djis cu British Airways pero mester reconoce otro socionan clave tambe, manera KLM y TUI, pa cual Aruba ta hopi agradecido pa nan colaboracion y partneship estrecho cu e isla pa yuda haci di e mercado aki, e di 2ndo mas fuerte for di continente Europeo.

   “Otro aña Aruba ta marca historia cu introduccion di e vuelonan aki, y trabao incansable a bay den esaki, y ta un logro inmenso pa Aruba, pa diferente motibo.”

   Ronella Croes a bisa cu si bay bek y pensa ta cuanto aña a inverti den esaki, por nota cu Aruba a intensifica e negociacionnan den e ultimo 7 añanan sigur.

   Croes a reconoce e forma cu Aruba ta traha, y el a wordo yama ‘Equipo Aruba”.  E ta reconoce cu tur dia, special pa adkiri servicionan aereo nobo pero tambe pa mantene esnan existente, y tambe pa amplia mas via di socionan existente di aerolineanan, el a bisa cu tur dia tin hende ta traha dia aden, dia afo.

   Aki e ta gradici esnan envolvi di Aruba Tourism Authority y tambe Aruba Airport Authority.

   British Airways lo bula 2 biaha pa siman, esta Diahuebs y Diadomingo cu un Boeing 777-200ER for di London Gatwich cu un stop di 1 ora na isla di Antigua, y despues ta yega Aruba pa turn around y sali atardi directo pa Londres.