Un tiki historia:
- Bin disfruta di e mercado Diasabra 7 di Maart
ORANJESTAD (AAN)-- Den e fin di siman aki, exactamente Diasabra 7 di Maart, di 8’or di mainta pa 12’or di merdia Departamento di Agricultura, Cria y Pesca tin su mercado di fruta, berdura, y diferente otro producto fresco, y nan lo celebra tambe nan di 50 aniversario, hunto cu tur cunukero, criado y tur esnan cu ta colabora cu sector primario, manera Nathalie Maduro, director, a informa DIARIO, y un biaha mas nos ta trece dilanti pa pueblo tene bon den mente.
Pero e bez aki nos ta trece acerca un bunita relato cu nos a tuma for di Santa Rosa su website, tocante parti di e historia di LVV y su desaroyo.
E relato ta bisa asina aki: “ Na aña 1976, Directie Landbow, Veeteldt, Visserij en Markthallen (Santa Rosa), a wordo estableci como un proyecto experimental di Gobierno”.
E ta sigui splica cu despues di añanan di negligencia y cu empleadonan demotiva, y mirando cu agricultura, cria y pesca ta forma parti integral di Aruba su historia y cultura, Gobierno a dicidi di duna extra atencion na e departamento aki y asina crea un plan di maneho flexibel y innovativo pa hiba e departamento di DLVV den un direccion nobo.
“E meta di e maneho nobo aki tabata pa mehora e servicio brinda pa pueblo en general, pero muy en particular pa e Agri-Hortticultor, Criado di bestia, Piscado y muchanan di scol.
E vision di Santa Rosa ta pa e departamento bira un lider den informacion, investigacion, innovacion, y guia riba tereno di Agricultura, Cria, Pesca, un departamento unda e cliente ta central y tin trahadornan contento y servicial. Durante e ultimo añanan, bao di maneho di Minister Otmar Oduber, conhuntamente cu e directoria Nathalie Maduro, e Departamento a mira un remodelacion completo.
A haci introduccion di mercadonan di Santa Rosa, cual tur luna ta duna pueblo e oportunidad di cumpra fruta, berdura y otro productonan organico, produci na Aruba mes. Alavez criadornan di bestia ta haya e oportunidad di bende nan carninan fresco cual ta aporta na nan economia.
Riba e potret aki por mira con Santa Rosa a cuminza na 1976. E potret aki a wordo saca cu tele-lens for di riba sero di Hooiberg. Den otro articulo un di dos parti di e relato aki.
