DVG a reacciona
ORANJESTAD (AAN): Di siman pasa caba DIARIO a publica e situacion aki. Awor tambe Departamento di Agricultura Santa Rosa a expresa su preocupacion pa cu e situacion unda sushi ta wordo benta rond di damnan na Aruba. Na diferente dam, sushi ta keda tira na rand of asta den e awa mes, algo cu Santa Rosa ta cualifica como condenabel.
E damnan aki no ta simplemente almacena awa. Na Aruba, hopi cunukeronan ta uza e awa di dam pa muha cosecha y tambe pa duna bestianan bebe. Ora sushi ta wordo tira na of den e damnan aki, e awa por wordo contamina cu bacteria, sustancianan peligroso of resto di material cu por afecta salud tanto di animal como di hende.
E peligro ta serio. Bestia cu bebe awa contamina por bira malo of transmiti enfermedad. Si e awa contamina ta usa pa agricultura, e contaminacion tambe por drenta den e cadena alimenticio. Esaki por crea riesgo pa salud publico, specialmente ora producto di tera local ta yega na consumo humano.
Ademas di esaki, tambe ta wordo haci un apelacion na companianan di chica pos pa tene cuenta cu e peligro cu nan por ocasiona. Deposita awa sushi den damnan of laba trucknan di chica pos cu awa di dam por contribui na contaminacion di e awa. Practicanan asina no solamente ta afecta medio ambiente, pero tambe por pone den peligro agricultura, bestianan y salud di comunidad.
E preocupacion ta aun mas relevante awor cu mercado di productonan local ta creciendo na Aruba. Cu mas produccion local ta wordo promovi y consumi, ta mas importante aun pa sigura cu e awa cu ta wordo uza pa agricultura ta limpi y seguro.
Autoridadnan ta sigui insisti cu damnan no ta lugar pa deposita desperdicio. Mantene e damnan limpi ta esencial pa proteha produccion local, bienestar di bestia y salud publico di Aruba.
