Denzil Tromp cu expectativa di e scol di musica cu ta bay habri awo den Semeleerstraat

E ta studiando musica na Gouda, Hulanda

ORANJESTAD (AAN): E mes no ta bin di un famia di musico pero for di chikito a sinti un inclinacion grandi pa tur locual cu tin di haber cu musica. A tuma nota cu semper cu tin musica ta resona den cas, cu e ta pasa man cu loke sea (pen, palo of algo) y asina cuminsa bati riba mesa, sofa of cualkier material cu e por saca musica for di dje.

   Di un mayor atento cu a reconoce e señalnan, a bin e decision di inscribi Denzil den les di muziek. “E mucha aki tin cu siña toca manera mester ta”, ta locual e mama a indica.

   Pa Denzil, e palabra disciplina ta hopi importante si kier logra cosnan grandi den bida. Esaki ta algo cu sigur mester tin si kier siña musica. E no ta facil, e ta hiba hopi esfuerso pero e ta agradecido na su mayornan cu semper a brinda nan sosten na su talento. Cu nan apoyo e caminda pa yega na musica no tabata asina leu.

   Nos ta bendiciona di por tin un cultura ‘rico’ y accesibel na musica. Unda bo bay riba nos isla, nos tin esaki como regalo di shelo. Lamentablemente pa siña musica, ta diferente. Esaki no ta mesun facil pero cu musica ta biba den cada un di nos, ta sigur y talento ta sobra.

Denzil ta mira cu nos ta gosa di hopi talento y cu ta algo cu nos mester saca probecho di dje, haci algo hopi  mas grandi y profesional cu ne pa asina hiba nos cultura/nos isla dilanti.

Un di su metanan ta di mira/habri un dia un scol di brassband na Hulanda mirando cu na e momento aki nan ta e unico brassband Rubiano na Hulanda. Denzil ta kere hopi den su isla, nos historia y cultura, cu ta algo cu semper e lo purba di trece den cualkier presentacion cu e haya.

   E ta mira den su propio seno familiar, caminda su ruman muhe y esposo Rubiano lantando yiunan naci na Hulanda cu mester di nan cultura. Mirando e diversidad cu ta existi na Hulanda, e Cultura di Aruba falta un empuhe cual ta un di su metanan pa aporta na dje.

   Diasabra awor 1 di November lo habri Porta pa Harmonia, lo tin diferente bendedo di productonan local, bar y cushina bon surti como tambe entretenimento di Aguinaldo Flor di Pasco, Gruponan Di Scol di Musica Rufo Wever, Caha di orgel y Grupo di baile