“Influenza no ta djis un simpel griep”
ORANJESTAD (AAN): Pa evita cu e grupo di ciudadanonan inmobil riba cama na cas y tambe esnan inmobiel den rolstoel desaroya complicacion of fayece debi na infeccion cu e virus di Influenza. DVG ta ofrece e servicio di vacunacion anual di Influenzana te na auto of te na cas pa e grupo di pashentnan aki.
Tur persona inmobil na cama (bedlegerig) cuminsando for di 6 luna, ta bin na remarke pa ricibi e vacuna di Influenza completamente gratis. Tur locual ta nesesario ta prueba di nan AZV. Famia cu ta desea pa nan familiar cu ta inmobil riba cama na cas ricibi e vacuna anual di Influenza por tuma contacto cu Seccion di Malesanan Infeccioso di DVG na telefon 522400 pa registra pa e servicio. DVG lo tin un team di enfermeronan cu lo pasa na cas segun cita pa brinda e servicio di vacunacion.
Pa pashentnan cu limitacion mobil por ehempel den rolstoel, DVG tin e servicio di vacuna den auto. Si e persona ta riba 60 aña tur locual ta nesesario ta su carnet di AZV, si e persona no tin 60 aña ainda e lo mester presenta cu un recept di dokter y su carnet di AZV. E persona por yega na seccion di Malesanan Infeccioso situa na Avicenastraat#1 (patras di edificio di DVG) entre dialuna cu diabierna for di 1.30-4.00 pm. Na su yegada su familiar of dunador di cuido mester baha pa haci e parti administrativo y un enfermero di e seccion lo sali pafo pa brinda e servicio di vacunacion den auto.
E adulto mayor cu ta biba den casnan di cuido lo wordo vacuna na e cas di cuido unda e ta biba, si familiar pidi pa esaki.
