Dentro di poco lo ehecuta fase 3 y fase 4 di proyecto Malmok Boardwalk

ORANJESTAD (AAN): Diahuebs mainta Minister di Turismo y Salud Publico Dangui Oduber  a tene un conferencia di prensa na Malmok, unda cu e mandatario a anuncia  continuacion di e proyecto yama ‘Malmok Boardwalk’.

   Manera anteriormente Oduber a menciona, su maneho ta pa sigui inverti den embeyecimento di Aruba su infrastructura y Diahuebs e minister a duna di conoce cu e proyecto di Malmok Boardwalk a wordo parti den 6 fase. Fase 1 y 2 di e proyecto ya caba a wordo entrega y awor ta bay continua cu fase 3 y 4.

   E meta di e boardwalk semper tabata pa mehora e seguridad di e area pa ambos turista y localnan, e mandatario a indica.

   Oduber a sigui bisa cu danki na e boardwalk tur hende por ta mas sigur ora nan sea cana of core bicicleta riba e caminda panoramico aki di nos isla.

 Proyecto Malmok Boardwalk ta wordo realiza cu fondonan di Tourism Product Enhancement Fund (TPEF).

Den fase 3 di e proyecto di Malmok Boardwalk lo bay embeyece e area na comienzo di e boardwalk y unda tin e pasarela di palo cu flora, pergola y banki.

E idea ta pa uza matanan cu ta autentico di Aruba. Segun e mandatario, si tur cos ta bon, DOW lo publica e destaho publico di fase 3 na fin di September.

Oduber a indica cu fase 4 di e proyecto ta bay conecta e boardwalk cu Ritz Carlton.

E idea ta cu den e parti aki di e boardwalk lo bay pone palo di coco. Esaki lo crea un bunita pasarela conectando cu Ritz Carlton. E plan ta pa e destaho publico di fase 4 wordo publica den e prome cuartal di aña 2024.

   TPEF (Tourism Producht Enhancement Fund) ta un fondo cu ta dirigi pa mehora producto Aruba, esaki nan ta haci por medio di inversion. TPEF ta inverti den conscientizacion, por ehempel den Stimami Sterilisami, cu ta e programa di steriliza cacho cu pushi. Tambe nan ta inverti den nos herencia y atraccion, manera ta e proyecto di renovacion di nos Museo Arkeologico Nacional. Nan ta inverti den seguridad y den tene nos costanan limpi. Tur esaki ta yuda eleva e producto turistico cu Aruba ta ofrece na nos turistanan.

  Minister Oduber a gradici e comision di infrastructura cu ta trahando duro pa ehecucion di tur e proyectonan di mehoracion y embeyecimento. E mandatario a duna gradicimento tambe na henter e Board di TPEF pa sostene tur su proyectonan.