ORANJESTAD (AAN) – Matutino DIARIO ta finaliza e entrevista cu a wordo realiza cu Lourdes Bramble, un profesional Arubiano hopi destaca na Hulanda y a wordo reconoci pa su amplio trayectoria y trabaonan na bienestar di hende vulnerable.
Un di e aspectonan cu ta resalta den e caracter di Lourdes, ta cu e no ta carga e mentalidad (basta comun), cu e tin cu traha di 9 or te 5 or y ta cla.
El a reitera cu su trabao tabata su hobby, pues e tabata hinca hopi tempo den dje, pa traha cu e diferente lidernan cu ta sinta den gobierno.
“Na Aruba, nan ta yama nan minister, aki nos ta yama nan ‘werkhouder’. Tur e hendenan aki Diahuebs siman pasa, cu mi tabata tin mi delaster dia na mi trabao (cu Stichting MeerWaarde) nan a traha un film masha bunita, unda cu e werkhouder, ex-werkhoudernan, y director di tur e organizacionnan cu mi a traha cu nan, a manda un mensahe hopi bunita pa mi. Esaki a pone mi keda hopi sorprendi, pasobra manera mi ta bisa tur hende, locual cu mi ta haci mi no ta hacie pa mi haya elogio”, e dama a expresa.
Unico cos cu Lourdes tabata tin como meta tabata yuda hende pa nan mes bay dilanti y siña con pa logra nan metanan, regla nan asuntonan y bira independiente, pues sin keda depende di otro personanan, locual ta un ganashi pa nan mes, manera Lourdes a reitera.
NA ARUBAHUIS:
Den su experiencia na Arubahuis, el a conta nos cu el a cuminza como Mentor na Haarlem cu Amsterdam, y despues, door di mi experiencia mi a wordo pidi pa hopi ciudad di estudio y aworaki mi ta ainda como Mentor pa un aña mas. Y naturalmente, mi a traha cu diferente Minister Plenipotenciario y diferente director di Arubahuis.
E prome Minister Plenipotenciario cu mi a topa cune, tempo cu mi a firma mi contrato na 2004, tabata Frido Croes (qepd), despues mi a haya mi cu Edwin Abath, Minister Yrausquin, nos actual Gobernador Alfonso Boekhoudt, y aworaki mi ta funcionando bao di Minister Guillfred Besaril”, Lourdes a relata.
Manera a bin dilanti caba, Lourdes a baha cu pension for di Stichting MeerWaarde y aki un aña e lo baha cu pension for di Arubahuis.
“Mi ta haci esey cu dolor na mi curazon, pasobra mi tin e gevoel cu mi tin ainda asina hopi cu mi por aporta na otro hendenan. Mi tin hopi conocemento di masha hopi tema”, Lourdes a expresa.
El a agrega cu e tabata tin su propio Bedrijf unda e tabata duna curso pa hopi organizacion na full Hulanda. “Mi tin duele, pasobra mi por yuda asina hopi hende ainda, cu mi conocemento y mi experencianan y mi ta sinti mi mes jong pa sinta na cas” Lourdes ta expresa.
ARUBA SEMPER PRESENTE:
Lourdes nunca a laga Aruba un banda. “Mi tabata bay Aruba masha hopi mes. Nos a traha un cas na Aruba y desde 2006 e cas teynan. Esey ta pone cu un of dos biaha pa aña nos ta bay Aruba. Mi ta ripara hopi cos na Aruba tambe. Tin ora ta duna mi duele pa wak cu tin ainda hopi hende vulnerable. Aruba a crece economicamente hopi, pero mi por ripara cu no tur hende por probecha di e progreso aki. Ora bo papia cu hende nan ta bisa bo cu si, pero cu no tin pobreza na Aruba. Mi sa cu tin pobreza! Mi sa cu hopi hende no tin suficiente entrada pa nan por biba drechi y come drechi. Esey ta un preocupacion grandi di mi”, Lourdes a remarca.
Otro preocupacion grandi cu Lourdes tin, ta cu e ta ripara den muchanan hoben cu e balor y normanan cu su generacion a lanta cune, ta full otro pa e hobennan di awe.
“Tempo cu mi a lanta tabata tin como norma cu bo mester respeta mayornan, cu bo ta tende di mayornan, pero mi ta kere cu esey ta hopi leu aworaki bao di nos hobennan, y esey ta haci mi dolor pa wak con nos hubentud ta bay on cu nan libertad, balor y normanan. Y tambe, manera mi a bisa prome, cu mi ta wak hende cu no por beneficia di e crecemento economico di Aruba. Hopi hende ta keda atras!”, Lourdes a declara.
PLANNAN PA FUTURO:
Den su plannan pa futuro, Lourdes kier haci algo bek pa Aruba. “Mi tin intencion di lanta un organizacion, of por ta mi por joint un organizacion na Aruba cu ta traha na bienestar di hendenan cu ta vulnerable, pasobra mi ta ripara hopi cos na Aruba, cu tin pobreza, muchanan cu tin ora ta bay scol sin come, y na esey mi kier haci algo. No pa yuda nan duna nan so, pero siña nan un manera cu nan mes por logra zorg pa nan mes”, Lourdes a conclui.
