ORANJESTAD (AAN): E proceso di vacunacion pa loke ta Covid-19 ta bayendo basta bon, pero asina mes por a mira cu e dianan aki e cantidad di hende cu ta acudi ta menos pa dia.
Riba esaki, Prome Minister Evelyn Wever-Croes a indica dialuna den conferencia di prensa cu gobierno ta haciendo un investigacion pa haya sa e motivo cu menos hende ta vacuna.
Manera ta conoci, un 56% a vacuna y e meta ta 85% di e poblacion. Kier haya sa kico ta pasando cu e 29% restante.
Ta hayando diferente investigacion cu ta sali di esaki y ta trahando riba cada un di nan pa mira si por yega ey ora cerca nan, ya cu nan no ta yegando na e localidadnan.
E mandatario a laga sa cu Minister Dangui Oduber ta preparando un plan riba con ta bay yega mas cerca di esnan cu ainda no a vacuna.
Tin hopi argumento. Tin argumentonan valido cu hende ta trece pa dilanti den e sondeonan y ta cosnan cu tin cu tene cuenta cu ne pa asina por yega na e proximo stap, Wever-Croes a remarca.
Otro paisnan tambe ta stagnando. Na Corsow tambe nan a yega na un punto. Na Aruba tin pa dia den promedio 304 persona cu ta vacunando ainda.
No ta cu no tin hende ta vacuna, pero no ta manera antes. No tin filanan, no tin hopi hende despues di e vacunathon cu tabata tin, pero cu e cantidad aki no ta bay keda cla. Pa keda mantene e medidanan dependiendo di e vacunacion ta wanta e economia cera pendiente di e vacunacion, esey ta un relacion hopi dificil pa mantene, a remarca.
Prome Minister a reitera cu ta trahando riba un plan nobo cu ta spera cu e siman aki lo wordo aproba y publica.
