ORANJESTAD (AAN) – Mama Tera ta celebra su Dia Internacional awe, Diaranzon 22 di April. Claramente nos Mama Tera ta pidi nos pa actua. Kico ta kehonan cu
nos ta scucha di nos Mama Tera, pero cu nos ta haci comosifuera cu nos ta sordo?
E oceanonan ta yena cu material di plastic y cada bez ta bira mas acido.
Calor ta birando cada bez mas extremo causando candelanan forestal grandi.
Inundacionnan den epoca di awacero, y un temporada di horcan den e area Atlantico cu a bati records caba, a afecta miyones di hende.
Na e momentonan aki nos ta enfrenta un terible virus yama “Covid-19”, un pandemia sanitario mundial cu un fuerte relacion cu e salud di nos eco-sistema.
E cambio climatico, e cambionan provoca pa hende mes riba e naturaleza, mescos cu e crimennan cu ta perturba e biodiversidad, manera deforestacion, e cambio di e uso di e suelo, e produccion agricola y di ganaderia intensivo, y el creciente comercio ilegal di e bida silvestre, por aumenta e contacto y e transmision di malesanan infeccioso di animal y hende, asina yama: “malesanan zoonotica”.
SEGUN PNUMA:
Segun e Programa di Nacionnan Uni pa e Medio Ambiente (PNUMA), un malesa infeccioso ta emerge den e ser humano cada cuater luna. Di e malesanan aki 75% ta proveniente di bestianan. Esaki ta mustra e relacion entre e salud di hende, bestia y ambiente.
PNUMA ta splica cu e eco-sistemanan ta sustenta tur forma di bida riba Tera. Di e salud di nos eco-sistemanan ta depende, directamente, e salud di nos planeta y su habitantenan. Restaura nos eco-sistemanan daña, lo yuda caba cu e pobreza, combati e cambio climatico y preveni un extincion masivo.
DECENIO DI ONU PA RESTAURACION:
E Decenio di e Organizacion di Nacionnan Uni (ONU) pa e restauracion di e eco-sistemanan, cu lo wordo lanza oficialmente riba Dia Mundial di Medio Ambiente ( 5 di Juni venidero), lo yuda nos preveni, detene y inverti e degradacion di e eco-sistemanan den tur continente y den tur oceano. Pero e lo wordo logra solamente si henter mundo ta duna di nan banda.
Ban corda, awe mas cu nunca, cu den e Dia Internacional di Mama Tera awe, nos mester di un cambio dirigi na un economia mas sostenible y resiliente, cu por funciona tanto pa e ser humano como pa henter e planeta. Laga nos promove e armonia cu e naturaleza y e Tera.
Aruba, ban uni nos mes tambe na e movecion mundial pa restaura nos Mama Tera.
