Den presupuesto 2024 ta spera di haya un surplus di 70 miyon florin

Minister Xiomara Maduro a duna un bista financiero pa 2024:

ORANJESTAD (AAN) — Minister di Finanzas, Xiomara Maduro, a duna un bista riba kico lo ta e entrada di Pais Aruba, su gastonan y di unda gobierno lo haya mas entrada, y cual ta e gastonan mas importante.

E dignatario a señala cu, sigur un punto hopi importante ta cu tambe e presupuesto aki, lo conoce un surplus.

“E aña aki, den 2023, ta e prome biaha cu despues di hopi aña Pais Aruba ta conoce un surplus, y den 2024 tambe nos ta spera di haya un surplus, e ora ey di 70 miyon florin, cual ta ekivalente na 1% di nos GDP. Esaki sigur ta un bon noticia, pasobra surplus ta locual ta yuda bo pa baha e presion di e debe, y un bez cu bo debe baha tambe bo ta baha e presion di locual ta e interes”, Minister Maduro a indica.

El a agrega cu ta importante cu no solamente e presupuesto 2024, pero e presupuesto coriente, esta di 2023, tin algo cu ta nobo y esaki den finanzas publico ta e echo cu, pa prome biaha, tin un nota di comienzo di aña.

“Esaki ta un nota caminda cu Parlamento, di comienzo di aña caba, ta wordo informa di cambionan cu ta presenta den maneho di locual ta gobernacion y ki consecuencianan esaki tin, financieramente. Pero importante ta cu Parlamento, e ora ey, di trempan ta wordo informa riba cambionan cu tin y si ta resulta den loke ta cambionan financiero, ta wordo pidi e aprobacion aki tambe. Y pesey, hunto cu e nota di comienzo di aña aki, nos ta presenta tambe un presupuesto supletorio na comienzo di aña, cual ya caba nos Parlamento por a haci e cambionan aki”,  e mandatario a relata.

Minister Maduro a sigui splica cu, normalmente, gobierno tin nota di fin di aña. “Kiermen, na fin di aña ta haci cambionan den e presupuesto, cu e presupuesto supletorio, pero awo como parti di e esfuerzonan pa drecha e maneho financiero di Pais Aruba, nos ta bin tambe cu e nota di comienzo di aña”, e mandatario a reitera.

E dignatario a señala cu pa Parlamento esaki ta importante pasobra, como cu nan ta miho informa, nan tambe por haci miho uso di nan derecho, pa haci cambionan di presupuesto di Pais Aruba, y esaki mas cu claro ta crea mas transparencia financiero. Pues, pueblo tambe ta wordo informa hopi trempan den aña caba, di cambionan cu gobierno ta bin cune, y den kico e cambionan aki ta resulta financieramente. “Y bo por tin un miho bista como pueblo, di e uso di fondonan publico, y hunto cune tambe e maneho financiero di bo pais”, Minister Xiomara Maduro a remarca.