Na caminda pa observacion di diez aña di tragedia financiero
- 2014 pa 2024 prueba cu mester di logro pa skirbi historia
- Dos dama ta entrega Reino e motibo di orguyo Arubano
ORANJESTAD (AAN)- Ora mundo papia di Aruba, cierto aspectonan special di Aruba y sigur e Pueblo di Aruba, ta bini dilanti.
Uno di e cualidadnan mas grandi di e Arubiano cu semper ta resalta, ta e orguyo cu e Arubiano ta sinti pa su pais ora e mester enfrenta mundo.
Orguyo di ta Arubiano y e forma cu un Arubiano legitimo nunca ta laga su pais cay, ta factornan sumamente importante den loke mundo ta yama Arubianismo.
E Arubiano no ta permiti ningun hende papia un palabra contra su pais y loke su pais por logra cu lucha grandi cu a hiba Aruba na e victoria di 1983 ora Reino Hulandes mester a entrega Aruba realisacion di su Status Aparte.
Na 1983 Hulanda a entrega mundo e prueba, cu Aruba por para riba su propio pia y cu Aruba ta capaz pa enfrenta futuro sin midi e esfuerzonan ni lucha necesario pa alcansa e horizonte cu tin na vista.
Na 2014 e imagen di e Arubiano triunfador, e Arubiano cu nunca ta permiti pa mundo mira un cara doloroso na e momentonan mas dificil cu e por confronta, a wordo herida.
Mundo a conoce un Prome Ministro cu a bira un homber sufriente den persona di Mike Eman, sinta den ambulance den huelga di hamber cu a bira un berguensa pa Aruba.
Aparentemente e imagen di un lider sufriente cu kier enfrenta morto debi na falta di alimento, mester a conduci na heroismo, loke a wordo destrui dor di Hulanda cu a baha Mike Eman for di teatro di drama y a pone sinta na mesa pa acepta loke lo a bira un puñal den curazon di Arubianismo.
Durante e ultimo diez aña, e Aruba heroico cu a logra Status Aparte di tur pais nobo di Reino Hulandes den Caribe, a wordo confronta cu un menasa serio.
Destruccion di e base financiero di Aruba, mara na un cadena di scandal politico bergonsoso, a haci hopi den Reino pensa, cu porfin e gigante Aruba a wordo venci.
E epoca 2014 pa 2024, sinembargo, a entrega mundo e menasa contra Arubianismo pero tambe e triunfo cu awe ta wordo entrega na Reino Hulandes ora cifranan y hechonan palpabel papia pa nan mes.
Na 2014 e scandal di un Prome Ministro den huelga di hamber mientras (manera awor den Sala di Corte ta wordo presenta den scandal) corupcion tabata subi su bandera, a crea e impresion cu e orguyo Arubiano a wordo condena.
Na 2017 Aruba a dicidi cu ta basta y un aire nobo a cuminsa supla pa awe duna su resultado.
E Aruba, cu Reino a spera cu lo a bati bancarota, na 2023 ta bolbe entrega Reino, cifranan cu ta bira prueba cu ta dificil pa derota e alma di Aruba.
Prome Ministro Evelyn Wever-Croes y Ministro di Asuntonan Financiero Xiomara Maduro, a restora e imagen di e identidad real di Aruba y ta presenta pa 2024 atrobe na Reino cifranan cu ta indica cu e pais no conoce perdida, pero awor tin un saldo positivo cu ta forma e barera grandi pa acusacionnan den Reino cu Aruba no por para riba su propio pianan ariba tereno financiero.
Na 2014 yegada di Reino a bira un humiliacion pa Aruba. Awe e realidad financiero cu Reino lo haya presenta durante e bishita di e Secretario di Estado Hulandes pa relacionnan den Reino, lo splica Hulanda cu Aruba ta capaz di yama su mes doño di su propio destino y cu Aruba ta capaz pa enfrenta futuro cu autonomia den su bandera.
Durante e bishita di e Secretario di Estado di Hulanda, Alexandra van Huffelen, Aruba lo splica Hulanda, cu Aruba por carga e responsabilidad di autonomia.
Gobierno Evelyn Wever-Croes cu e experto financiero como su dirigente financiero Xiomara Maduro, lo entrega Hulanda e prueba cu Aruba tin motibo di ta orguyoso como luchador y cargador di autonomia, di Status Aparte!
