Franchesca Heinze di ATHA:
ORANJESTAD (AAN): Asociacion Trabao di Hubentud na Aruba (ATHA) lo organiza un biaha mas su ‘ATHA Tweens Camp’ durante vakantie di augustus. E camp ta destina principalmente pa muchanan entre 8 y 13 aña. Sinembargo, segun Franchesca Heinze di ATHA, por haci excepcion pa muchanan di 7 of 14 aña, dependiendo di nan nivel di desaroyo.
E camp ta relaciona especialmente cu celebracion di Dia Internacional di Hoben, cu ta tuma luga anualmente dia 12 di augustus, y lo desaroya durante henter e siman.
ATHA Tweens Camp lo tuma luga di dialuna 10 pa diabierna 14 di augustus,
diariamente di 8:00 a.m. pa 4:30 p.m.
Durante e siman, participantenan lo disfruta di un programa varia cu actividadnan educativo, recreativo y social. Entre otro, lo tin un bustrip, actividad riba rif, piscamento, kampvuur, bishita na e murals na San Nicolas, waterpark, kayak y coremento di cabay.
Señora Heinze a subraya e importancia di tene muchanan ocupa cu actividadnan sano y constructivo durante temporada di vakantie. ATHA Tweens Camp no ta enfoca solamente riba educacion y recreaccion, sino tambe riba desaroyo social.
Tur actividad ta prepara pa duna muchanan oportunidad pa conoce otro, crea amistad y siña habilidadnan nobo. Por ehempel, durante e actividad di piscamento, nan lo siña tecnica basico di pisca, mientras cu otro actividadnan lo stimula cooperacion, responsabilidad y trabao den grupo.
Durante e bustrip, lo pone enfasis tambe riba e parti comunitario. A lo largo di e ruta, participantenan lo forma parti di un competencia pa colecta sushi, cu e meta di stimula cuido di medio ambiente y responsabilidad pa cu comunidad.
ATHA ta invita mayornan cu ta interesa pa nan yiunan participa na ATHA Tweens Camp, di dialuna 10 pa diabierna 14 di augustus, pa tuma contacto.
