Herrick Henriquez, director di ATIA:
*Comerciante ta boga pa paga anualmente
ORANJESTAD (AAN) – Den su entrevista cu DIARIO, e director di ATIA, señor Herrick Henriquez, a sigui bisa cu nan sa cu DIMAS tin e posibilidad caba pa otorga “multiyear permits” (permiso multi aña).
Henriquez a bisa cu esaki ta algo cu ATIA a discuti cu DIMAS den pasado, ora cu nan tabata tin reunionnan cu nan. El a bisa cu e comerciante por aplica pa un permiso multi aña y segun e por paga pa tres of cinco aña, pero di un solo bez.
“Pero unda cu e problema ta sinta ta cu, como comerciante, bo tin cu paga full e tres añanan den un biaha. Si bo n' tin un contrato bon traha y b’n tin e seguridad cu e empleado ta bay keda, e comerciantenan no ta bay inverti den un permiso di tres aña, si bo sa cu no por lock e empleado ey pa keda cerca bo. Esey ta algo cu nos a trece dilanti den DIMAS den pasado tambe”, Henriquez a señala.
El a agrega cu si por paga e permiso pa aña, si e empleado bay e comerciante no ta perde tres aña di placa.
Director di ATIA a indica cu tin maneranan na DIMAS tambe cu por regulariza hendenan cu ta indocumenta caba, esey ta eigenlijk e meta cu nan a traha riba dje aña pasa, pa regulariza un par di hende cu ta trahando caba. “Tambe nos a puntra pakico Hulandesnan no tin mag di traha. Di con den un pareha Hulandes esun cu a bin pa traha ta haya un vergunning pero su partner ta haya permiso pero no pa traha”, el a señala y a agrega cu hopi biaha ta parehanan jong y tur dos ta profesional, pasobra Aruba ta atrayendo profesionalnan di afo.
ATIA ta pensa cu por duna tur dos un permiso di trabao pero laga e partner busca su trabao, unda despues di tres luna e mester raporta na DIMAS cu el a haya un trabao.
E ta kere cu cosnan asina ta maneranan pa agilisa e departamentonan. ATIA sa cu DIMAS tin hopi trabao y pesey nan ta pidi comercio tin pasenshi, pero tambe pa e departamento agilisa un tiki mas y wak cu esaki ta algo cu ATIA mester.
