Shurman Milliard di 131:
*Mester duna mas atencion na e problema
ORANJESTAD (AAN): Recientemente DIARIO a entrevista Shurman Milliard di 131, riba e fenomeno di automutilacion bao di hobennan na Aruba y el a splica cu tin momentonan cu hobennan ta sinti hopi tristo y esaki por tin di haber cu problemanan mental.
“Automutilacion ta ora cu un hende ta haci su mes daño y esey por nifica por ehempel cortamento di curpa of dal su mes na muraya”. Esaki por sosode bao di hobennan, pero tambe adultonan hoben, unda cu nan por cuminza corta nan mes. E ta algo cu ta sosode varios biaha y nos ta haya yamada di esaki, segun Milliard.
El a splica cu tin hoben cu ta corta nan mes y otronan ta bebe un cantidad di pildora.
Segun Milliard e tipo di actonan aki por wordo mira como actonan pa hala atencion, mirando cu varios hoben cu ta pasando den momentonan dificil ta sinti cu nan ta invisibel. Specialmente ora cu nan ta sinti cu no tin hende pa duna nan atencion y papia riba kico nan ta sinti. “Sinembargo nos ta wak tambe cu automutila ta un manera cu nan ta pensa cu ta yuda e dolor sali di nan curpa”.
Psikiatranan ta splica cu e momento cu e persona wak e sanger sali for di su curpa, ta e momento cu na ta sinti cu e presion ta sali for di nan curpa.
Un otro motibo tambe ta cu e dolor cu otro hende ta hacibo, bo no tin control di esey, segun Milliard.
El a sigui bisa cu bo no tin control riba e termento, dalmento of abuso cu otro hende ta haci.
Esaki mientras cu nos tur kier tin control riba nos curpa.
Pues corta nan propio curpa ta un manera pa mustra cu nan tin control riba nan propio curpa.
“Pesey nos ta wak cu automutilacion ta sosode den nos comunidad bao di nos hobennan, pero tambe bao di nos adultonan”, segun Milliard.
El a splica cu e manera con hendenan ta automutila nan mes ta varia. Tin por haci esaki na nan pols of braza, pero otronan ta hacie mas scondi, por ehempel na nan lies of na nan pia.
Segun Milliard den nos comunidad ainda e tipo di cosnan aki ta wordo mira como un taboo y hende nos gusta papia di dje pasobra nan no kier wordo mira como vulnerable of zwak.
“Na 131 si nos ta wak cu tur luna esaki ta bin dilanti, pues asina bo ta wak cu e ta un problema cu hende kier y ta papia di dje, pero pa bise esey caba hopi biaha ta traumatico”, segun Milliard.
Pesey ta importante cu tin instancia y fundacionnan nan cu ta duna charla riba e topiconan, mientras cu 131 ta sali den prensa pa laga hende sa cu e tey pa brinda ayudo y sosten.
