Den Pacifico horcan Hillary a dicidi pa tormenta Franklin!

Temporada di horcan 2023 a entrega Aruba momento di suspenso

*Ruta di Hillary a desvia Franklin for di su ruta pa Pacifico

*DIARIO cu e relato tras di e paralisis di un tormenta tropical 

ORANJESTAD (AAN) — Manera DIARIO a indica na su lectornan e siman aki, uno di e tareanan mas importante di DIARIO ta, pa informa Aruba riba tur aspecto cu ta mishi directamente cu bienestar di e Arubiano.

Vigila sistemanan di tempo cu ta menasa bida di e Arubiano, ta uno di e debernan sagrado di DIARIO, cu Dialuna anochi a tuma nota, cu algo tabata pasa cu tormenta tropical Franklin, cu no a sigui cu e rumbo usual di Oceano Atlantico pa Oceano Pacifico den Caribe.

DIARIO tabata sigui tur imagen di satelite y informenan di radar, pa asina vigila e progreso di e sistema, cu tabata avansa den region di Caribe y no tabata parce di lo a causa ningun problema pa e parti mas abou di region di Caribe, di cual Aruba tambe tabata forma parti.

DIARIO tabata atento pa posibel formacion di e Zona di Convergencia Intertropical riba Venezuela, cu tambe tabata basta bashi.

Tur cos tabata parce di lo a cana segun normalidad y continuamente DIARIO tabata vigila tambe e advertencianan pa alarma cu lo mester a wordo bati den caso cu e sistema Franklin dicidi di desvia.

Region di Caribe tabata conoce e suspenso cu tabata presente den Pacifico for di algun dia debi na e existencia di un sistema cu a haya nomber di Hilary cu a causa basta problema pa e costa Pacifico di Merca pa finalmente afecta otro parti di Merca tambe.

Merca a registra inundacionnan pisa pa motibo di Hilary, cu a sunbi tera na Mexivo pa ocasiona desastre na e parti Sur di estado California.

Asuntonan cu no tabata haya tanto interes di region di Caribe, cu no a tene na consideracion cu Hilary lo a influencia tormenta tropical Franklin den region di Caribe.

Tabata wordo spera cu Franklin lo mester a baha su velocidad pa asina e por a cuminsa subi den region di Caribe y ya na Haiti y Republica Dominicana alarma di tormenta a wordo bati.

Ta na e momento cu Franklin mester a dal e buelta el a baha su velocidad y hasta a paralisa.

Tabata ya den horanan lat y na entrada di dia 22 di Augustus cu Franklin a cuminsa zak y Aruba a wordo sorprendi pa yobidanan pisa, cu strena y lamper cu a causa basta destruccion.

Informacion cu DIARIO a ricibi ta, cu na aeropuerto di Aruba tambe lamper a causa consternacion.

Un momento historico a wordo presenta atrobe na na region di Caribe den e temporada di horcan cu e siman aki a presenta cinco sistema cu tabata cruza di Africa pa region di Atlantico.

Aruba a wordo sorprendi pues pa e resultado di e hecho cu Hilary no a permiti Franklin sigui cana y Franklin tampoco no a subi pero a zak ora e mester a desvia y a percura pa un situacion pa cual DIARIO a adverti Aruba den e temporada di horcan 2023, cu debi na cambio di clima sigur ta exigi estado di alerta.

Cu e informacion aki DIARIO ta presenta realidad di e motibo cu Aruba a wordo sorprendi pa un situacion di tempo cu a causa basta problema pa e pais pero tambe a duna prueba di e necesidad di bon informacion di tempo na Aruba pero tambe vigilancia y interes di henter comunidad, cu mester ta prepara.

DIARIO ta entrega constancia di 24 ora di trabou na Pueblo di Aruba!