“Ya caba tin problema social y psicologico den nos comunidad y ta bay haya mas”
ORANJESTAD (AAN) – Siguiendo cu e tema di costo di bida na Aruba, Otmar Oduber a indica, den conferencia di prensa di Diaranzon, cu tur consecuencia di tur medida cu wordo tuma, ta pasa pa nos comunidad. Ki medida, ki ahuste cu wordo haci ta un peso adicional pa nos comunidad, cu ta bay crea na su turno e problemanan social cu nos ta bay haya.
“Ya caba nos tin den nos comunidad problema social y psicologico cu ta bay traha riba mente di cada un di nos conciudadanonan aki na Aruba” Oduber a señala.
“Simplemente prijs di awa cu coriente nos no por biba cune mas. Prijs pa loke ta trata productonan necesario pa nos por biba, nos no por cu e prijsnan aki mas, combustible, gasoline nos ta papia cu awe ta bay subi, mañan ta baha, pero realidad ta cu durante e ultimo añanan aki el a subi dramaticamente, y mientras cu no tin discusionnan ta andando tocante con nos ta bay reduci gastonan di gobierno, y haci e aparato gubernamental mas eficiente y aki mi ta papia di tur politico aki na Aruba: nobo, jong, generacion bieu dinosauro of tur esnan cu ta kere cu nan ta drenta awe den politica, e yamada na cada un di nan pa ban mira con nos reduci gastonan cu tin den gobierno”, Oduber a enfatiza.
El a haci un yamada pa ban haci un dialogo nacional na e momentonan aki. “No mañan, no otro siman, no otro luna, no ora mester di otro 20, 30 miyon cu mester saca for di pueblo, pero aworaki yama tur hende hunto, laga nos tin e grandeza como politiconan di bisa cu nos ta dispuesto di sinta hunto na mesa, haciendo invitacion na Gobierno di Aruba. No ta cuestion di ataca MEP, AVP, of ningun di e partidonan nobo sea paden of pafo di Parlamento; ta cuestion di atende cu un situacion cu pueblo no por atende cune! Si pueblo por a bisa ‘mi ta bay baha mi costo di bida’, kere mi nan lo hacie!” Otmar Oduber a remarca.
Pero pueblo ta depende di instancianan, gremionan, y e cuerpo politico di Aruba, pa e cambionan aki tuma lugar. “Pues no ta na otro caminda cu no ta gobierno, y e gobierno di turno cu ta den coalicion na e momentonan aki, mester duna e prome paso di bisa cu nos ta bay sinta hunto”, Oduber a indica.
