Den My Computer Junior Tournament tenista di diferente edad por enfrenta otro basa riba nan nivel

ORANJESTAD (AAN): My Computer Junior Tournament ta un torneo di tennis cu ta den full swing.

Den un entrevista cu DIARIO Gian Hodgson, di e federacion di tennis di Aruba, a splica cu e torneo aki ta a base di nivel.

Esey ta nifica cu e tenistanan ta hunga contra otro, dependiendo di nan nivel y no nan edad.

Hodgson a splica cu por ehempel por tin un tenista di 12 aña cu ta hunga contra uno di 15.

E nivel mester ta cerca di otro, pa asina nan hunga un wega competitivo.

Hodgson a splica cu tur aña ta organiza entre 6 cu 8 torneo, cu mayoria biaha ta rond di fin di luna.

“Hopi di e muchanan ta percura pa participa na cada torneo y e parti bunita ta cu bo ta wak con cada biaha nan ta mehora nan wega”, segun Hodgson.

El a splica tambe cu e muchanan sa haya un evaluacion cada tanto tempo, pa yuda nan mehora.