Minister Dangui Oduber
* un recuperacion di 105% compara cu Augustus di 2019
ORANJESTAD (AAN): Minister di Turismo y Salud Publico sr. Dangui Oduber ta informa riba cifranan di turismo pa cu e luna di Augustus 2022 presenta pa Aruba Tourism Authority (ATA). Un biaha mas den luna di Augustus 2022 e cifranan a surpasa e nivelnan di mesun luna di aña 2019. Nos turismo ta sigui crece y recupera, semper despues di temporada dificil ta sigui mihor temponan.
Den luna di Augustus 2022 Aruba a ricibi un total di 100,770 bishitante via nos aeropuerto y esaki ta un recuperacion di 105% si compare cu Augustus di 2019 unda cu Aruba a ricibi 96,100 bishitante. Locual a resalta un bes mas den e raportahe ta e recuperacion di nos mercado mas importante cu ta Estados Unidos cu a registra 110% di recuperacion den luna di augustus 2022.
E maneho di Minister di Turismo sr. Dangui Oduber ta dunando su resultado y esaki por mire den e cantidad di turistanan cu ta yega nos isla tur dia. Esaki ta bira di 5 luna consecutivo cu e recuperacion ta surpasa nivelnan di aña 2019.
Minister Oduber ta hiba un maneho unda tin un bon cooperacion cu tur e partnernan den e sector turistico. Un danki na tur e partnernan y sigur tur esnan cu ta labora den e industria cu ta brinda e tremendo servicio. Minister Dangui Oduber ta bay sigui enfoca riba e crecemento di Aruba su turismo den cuadro di e aña di recuperacion pa asina mantene e trend aki.
