Michella Steenvoorde-Lacle Presidente Comision:
ORANJESTAD (AAN) -- Michella Lacle, Presidente di Plan di Mayor, a menciona durante su presentacion pa DIARIO, cu e Ley na Hulanda a bin, pasobra mescos cu otro paisnan Hulanda tambe a ratifica e Tratado di e Derechonan Internacional di Mucha. Aruba tambe a ratifik'e na aña 2001.
Den e Tratado di Derechonan di Mucha tin algun articulo cu ta relevante pa Plan di Mayor Obligatorio.
“Na Aruba, nos a reitera esaki na 2001. Kiermen, nos tambe ta parti di dje. E tratado di mucha tin 52 of 53 articulo, y esnan cu ta relevante pa Plan di Mayor ta articulo # 3, cu ta stipula cu cual sea e decision cu bo tuma cu ta regarda e bida of bienestar di bo yiu, e mucha mester ta na prome lugar. Pues no e pareha nobo, of e trabao nobo, oportunidadnan nobo, pero e mucha, y articulo # 9 cu ta bisa cu e mucha tin derecho di ta den contacto cu ambos mayor apesar cu tin divorcio of un separacion! Tambe articulo 11 cu ta bisa cu un mayor no mag di secuestra un mucha asina e ta su yiu biologico” Michella ta acentua.
El a agrega cu articulo 12 ta bisa cu un mucha tin derecho di wordo scucha y articulo 18 ta stipula cu Estadonan tin obligacion di traha e leynan y beleid pa por haci posible cu e mayornan cumpli cu e derechonan di mucha.
