ORANJESTAD (AAN): Recientemente den colaboracion estrecho e dos organizacionnan,
Fundacion Pa Nos Muchanan conhuntamente cu Stichting Tienda di Educacion a finalisa cu e trayecto piloto pa Mamanan deteni den KIA.
Na 2022 e proyecto piloto aki a worde ofreci na tatanan deteni y awor tabata turno na e mamanan. Ta trata di un total di 10 sesion ofreci cu perspectiva ariba nan regreso pronto den bida di nan yiunan y tambe enfasis na un mihor ser humano pa contribui positivamente na comunidad. Prome sesion pa e mamanan a start na maart y a culmina na mei ultimo, caminda cu nan a ricibi un certificado di participacion durante un momento ameno di clausura di e trayecto.
E temanan trata ta lo siguiente: (*) Introduccion di e trayecto y un presentacion di e fundacionnan organizador. (*) Participacion di mama den bida di su yiu(nan). (*) Fase di desaroyo 0- 12 aña. (*) Fase di desaroyo 13 - 22 aña. (*) Presupuesto. (*) Educacion sexual. (*) Sexualidad. (*) Salud mental. (*) Comunicacion positivo. (*) Entre mayor y yiu, un comienso nobo.
DIARIO a compronde cu e meta principal di e proyecto ta pa reenforsa e mamanan cu informacion y herment pa mantene contacto positivo cu nan yiu(nan) durante y despues di nan detencion. Di e forma aki ta fortalese e laso entre mama y yiu. Na mes momento ta prepara e mamanan cu herment pa ora bolbe cas back.
Nan ta siña reconoce y prepara pa posibel cambio den comportacion di nan yiu (nan), desaroyo di mucha, e importancia pa duna e yiu(nan) espacio pa custumbra di nobo y con pa fortalese e conexion entre mama y yiu.
Alaves ta enfoka ‘riba e mama como persona y e rol importante di mayor y educador cu e tin. Diferente organizacionnan profesional a comparti nan expertisio cu e participantenan. E detenidonan a sera conoci cu e organizacion, a ricibi informacion tocante e tema y a haya sa unda por acudi na momento cu tin necesidad di esaki.
Asina e trayecto a conta cu colaboracion di señora Thaisa Thielman di Departamento di Asunto Social den su experticio con pa traha un presupuesto señora Eveline Yarzagaray & Ghislaine Koeiman di Famia Planea den locual ta trata sexualidad, sr. Jose Mendoza di Stichting Hunto a trata e topico di salud mental y señora Drs. Swinda Dumfries, señora Maritza Ordonez & Sr. Aldrick Dirksz di Directie Volksgezondheid a elabora tocante e topico di comunicacion positivo. Señora Janelle Artsen y señora Felishah Ponson di Fundacion Pa Nos Muchanan y Elisa Zievinger di Stichting Tienda di Educacion a elabora ‘riba diferente temanan. Di parti Fundacion Pa Nos Muchanan señora Natasha Gilkes y di Stichting Tienda di Educacion sr. Rhomyko Winklaar a coordina e trayecto piloto aki y a trata e otro temanan den cuestion.
Intencion ta pa haci e trayecto aki uno structural pa e detenidonan, ambos femenino y masculino den KIA cu ta un mayor. Lo sigui tambe cu sesionnan den 2024 y asina prepara detenidonan pa nan regreso den famia por ta uno cu balor agrega na bienestar di e muchanan. Di e forma aki ta duna participantenan un perspectiva y prepara nan pa forma parti di nos comunidad y ta un mihor ciudadano en general.
Fundacion Pa Nos Muchanan conhuntamente cu Stichting Tienda di Educacion kier gradici señora Shereida Simmons, trahador social di KIA y sr. Luberth (Gino) Winklaar, director di KIA, como tambe henter e personal di KIA pa e oportunidad y e colaboracion brinda durante e trayecto piloto tras di lomba.
Fundacion Pa Nos Muchanan ta situa na Cumana 2. Orario di servicio ta di 8:00 am te cu 4:30 pm, mientras cu Stichting Tienda di Educacion ta situa den edificio di Centro Pa Hoben y Famia, Sabana Blanco 68-C. Orario di servicio ta di 8:00 am te cu 6:00 pm.
