SETAR ta celebra su di 20 aña como empresa NV:
*A haci inversionnan cu a pasa 800 miyon florin
ORANJESTAD (AAN) – Den cuadro di su di 20 aña di existencia como un compania priva, (SETAR NV) a yama un rueda di prensa, cu tabata tin como invitado special Minister Geoffrey Wever, titular di Economia, Comunicacion y Desaroyo Sostenibel.
Roland Croes, director di SETAR a inicia e rueda di prensa, y a duna un presentacion tocante con nan ta mira e añanan cu a pasa y unda nan ta bay. Banda di esaki nan a traha un video cu nan ta bay warda pa futuro, di locual a pasa durante e ultimo 20 añanan di trayectoria di e compania.
El a menciona cu tabata tin un reunion plenario informal, den cual nan a discuti un tiki tocante kico ta pasando, y con SETAR ta bay dilanti.
Prensa a wordo invita tambe pasobra esaki ta un ocasion cu no por pasa sin ser nota, pero cu mester wordo celebra, segun director señor Roland Croes.
El a bisa cu mirando unda e compania a cuminza y unda e ta bayendo awe, ta pasonan grandi a tuma lugar e tempo ey loke hopi biaha hendenan ta lubida, y cu ta bon pa recorde bek.
Croes ta celebra 33 aña trahando cu e NV y 20 aña como director di SETAR NV. Na aña 2003 no tabata tin e sistemanan moderno di internet, y tabata tin telefon sin screen di color, tabata tin conexion telefonico internacional, fax, y te ainda tin un par di hende cu tin telex.
El a agrega cu e edificionan tabata den un estado no mescos cu awe, y cu mester a drecha nan ful.
Awendia, e telefonnan ta completamente computariza, speednan te 300 biaha mas lihe, tin hende cu por traha na cas, prensa por transmiti en bibo awe, unda cu den e tempo prome por a wak den storia. Cu internet y companianan manera Netflix y Amazon, cu ni un tabata tey mes.
Roland Croes a remarca cu awe SETAR tin tur e tecnologia despues di loke a pasa den dje. Croes a recorda campañanan manera “Wow” y “Setar di bo”, y e ta corda e actividad sparking tour cu 7mil pa 8mil hende a wak e hubentud, e artistanan sali fo'i dje y esey eigenlijk ta e SETAR cu 20 aña pasa a cuminza cu tur e tecnologia cu tabata tin eytras.
Tocante e servicio mes, SETAR ta un compania cu di 80 mil pa 90 mil cliente cu tin servicio di dje, awendia tin 180 pa 200 mil account.
E compania a bira dos biaha mas grandi pa loke ta servicio y cu tabata tin 430 trahado, awendia tin 380 trahado. Kiermen, tin menos pero e ta brinda tur e servicionan riba dje cu ta den crecemento aworaki basta grandi, pasobra na aña 2028 SETAR kier tin coper nada mas, un mundo di puro fibra, y un mundo di 5g, y hasta nan ta pensando pa 6g caba, cu ta biniendo na aña 2030. Esey ta e mundo cu SETAR ta aden.
El a gradici tur gobierno, tur minister, y e Raad van Commissaries tambe, cu a duna SETAR nan sosten y oportunidad pa desaroya nan proyectonan. Den 20 aña SETAR a haci inversionnan cu a pasa 800 miyon florin. Dividendo cu a pasa 200 miyon y belasting mas cu 200 miyon, pues un compania cu a genera mas cu un milliard pa Aruba, durante e 20 añanan aki.
