Sucesonan mundial ta exigi pa formula balor humano atrobe
- Sector di Husticia ta defensa di democracia contra abuso
- Abuso di poder ta cambia estado di derecho den un tirania
ORANJESTAD (AAN)- Kico a pasa cu felicidad di hende?
Esaki ta e pregunta clave cu ta surgi ora tuma nota di acontecimentonan mundial na un momento cu hende ta pretende cu comunidad moderno, tin e supuesto hermentnan decisivo pa bienestar humano.
Pa por papia di bienestar humano, na prome lugar mester papia di e sentido di felicidad di hende, cu ta gosa di e defensa cu ta wordo brinda na su persona contra situacionnan den cual e no por proteha su mes.
E pandemia Covid-19 a entrega mundo e prueba cu e sentido mas profundo di democracia ta haci posibel, pa gobernacion y autoridad di un pais democratico, defende hende hasta contra su mes si esaki ta na bienestar di e hende.
Esaki ta e motibo pa cual a decreta lock down, a exigi tur hende tapa boca y a silencia economia y entrada di placa pa scapa e bienestar di hende for di enfermedad traicionero y cruel.
Pa comprende y papia di democracia, mester comprende con Husticia mester funciona.
Autoridad no ta basa riba represion di e ser humano, pero hustamente riba liberacion di e ser humano di condicionnan cu ta pone su mes, comunidad y otro ciudadanonan na peliger.
Pa e ser humano por keda central, hamas por mata e ser humano of destrui su alma of curpa, pasobra abusa di e palabra “autoridad” y e posibilidadnan cu comunidad ta entrega na representantenan di autoridad.
Paz y orden ta elemental pa un estado di derecho, cu mester ta respetuoso pa ley, pa asina un nacion por funciona na bienestar di e hende cu ta busca su propio bienestar y di comunidad dor di observa leynan na bienestar di hende y di pais.
Hamas den un sistema democratico, abuso di poder por haci posibel loke awe atrobe a bira noticia, ora un grupo di agente policial a uza forsa bruto cu a conduci na morto di un ser humano.
DIARIO ta papia aki di un moral basico, cu DIARIO a defende for di e prome momento di su historia como matutino di Pueblo, cu ta defensa di cada un ciudadano, cu por bira victima di abuso di poder.
Ta di aplaudi cu na Aruba, manera durante e historia di DIARIO a keda proba den publicacionnan, consenshi humano semper a triunfa ora na forma individual intentonan a wordo haci, pa trapa riba bienestar y felicidad di hende.
Awe e Derechonan Humano Universal mester wordo formula atrobe. E derecho mas grandi di hende, cu ta e derecho pa wordo trata como hende y no como obheto sin balor cu por mata pasobra el a comete un infraccion den trafico.
Cu razon na Merca awe ta defende bida di un ser humano, cu a wordo destrui pasobra e no a cumpli cu un ley di trafico.
Na paisnan dictatorial, manera Rusia, e persona cu no kier muri tambe, mester cera su boca ora hende wordo mata.
Na mes momento mundialmente mester pone mas regla y mester tuma mas precaucion ora ta nombra hende den posicionnan, cu ta permiti abuso di poder.
Trabou di autoridad no ta facil. Deber y responsabilidad ta un peso grandi cu no ta tur hende por carga.
Nombramento den puestonan clave den tur sector, pasobra tin abuso administrativo tambe, mester wordo somete na mas regla y control pa evita abuso di un titulo of posicion cu mester sirbi hende y no destrui hende.
Tur loke ta existi ta alcansa un momento di reforma. Sucesonan internacional a demostra cu sigur den nos mundo moderno cu a afecta moral, mester bolbe somete y sigui somete actuacion di hende na control y reforma, cu a permiti evolucion positivo di e raza humano for di inicio di su historia.
Mester entrega palabra na nos baluartenan local, cu na momentonan mas dificil a fungi como lider y autoridad di Aruba, e pais cu mundo ta duna reconocemento pa e forma cu e ta trata hende a base di e pakete moral di Arubianismo cu nos mester sostene cu alma y curpa!
