Habri frontera ta uno di tur maniobra pa Nicolas gana eleccion
- 55% di preso politico Venezolano nunca a comete un delito
- Desesperacion di Venezolano lo produci voto liber pa Nicolas?
ORANJESTAD (AAN)- Un di e preguntanan grandi cu DIARIO, Aruba y poblacion mundial ta haci nan mes ta, pakico diripiente Nicolas Maduro kier porta porta y bentana di e Venezuela cu e mes a pone na candal.
E asunto cu na nos parecer no ta haya suficiente atencion, ta e aspecto crucial cu aparentemente ta wordo lubida.
Pakico Nicolas Maduro diripiente kier bula manera un paloma di paz, di un pais pa otro y kier bende petroleo cu tur pais y compania cu kier cumpra?
Pakico e cambio den actitud di Nicolas y su Gobierno? Pakico ta asina importante pa no solamente den e partido di Nicolas pero tambe e partido di Juan Guaido, bolbe na 2015?
Esaki ta e contesta pa tur pregunta.
Na 2015 Venezuela a tene e ultimo eleccionnan cu paisnan democratico ta considera como eleccion “liber”.
Despues di e eleccionnan aki, prueba a keda entrega cu Nicolas Maduro a hunga cu henter e sistema electoral y gubernamental democratico di Venezuela cu finalmente el a pone un banda pa sigui dilanti como lider dictatorial di Venezuela, cu el a destrui na tur sentido.
Publicacionnan mundial ta duna prueba di loke nos ta trece dilanti.
E problema grandi di Nicolas Maduro actualmente ta, cu el a priminti tur lider na mundo cu e lo drecha su bida (si ainda esaki ta posibel den tur loke el a haci cu su bida) pasobra e mester cambia su aspecto pa enfrenta eleccion 2024.
Nicolas Maduro na e momentonan aki mester di tur sosten cu e por haya na mundo, pa e por enfrenta e loke a resta di comunidad Venezolano na Venezuela.
Con cualkier politico ta pensa cu e por enfrenta Pueblo despues di loke Nicolas a haci cu Venezuela?
Na e momentonan aki 55 porciento di e presonan politico na e pais, nunca a comete un delito. Nan ta preso pasobra nan ta contra Nicolas.
Enfermedad ta destrui e Venezolanonan, cu ainda a keda nan pais, despues cu as cu 7 Miyon Venezolano a dicidi cu nan no kier biba mas na nan pais.
Merca a cuminsa suavisa e sancionnan contra regimen di Maduro, pero ainda e pais tin un caminda largo di cana.
Tambe mester comprende cu paisnan liber ta exigi pa e cambia su bida y su gobernacion si e kier haci negoshi cu nan.
Nicolas Maduro ta enfrenta un momento crucial, cu mundo liber ta ignora y silencia.
Di partido di Juan Guaido tabata kier cambio, ta pa motibo di eleccion. Si Nicolas Maduro ta manda su hendenan rond mundo pa habri frontera, pa bende petroleo, pa mira con e ta haci placa yena Venezuela cu a bira mendigo na man di Chavismo, ta pasobra eleccion ta acerca.
Na 2022 Nicolas a yega di lansa e pensamento cu por adelanta eleccionnan 2024. Di e forma aki e ta pensa pues cu e lo tin pues menos poder na 2024 cu e tin na 2023.
Ta di aplaudi cu Aruba no a cay den e trampa di Nicolas cu kier mira tur porta habri pa asina e por splica e Venezolanonan cu ta muri di hamber, malesa y desastre social kico Comunismo y tirania a haci cu Venezuela, cu ta uno di e paisnan cu naturalesa a entrega rikesa enorme.
Aruba mester sigui mira e interes di Aruba, cu finalmente ta e interes tambe di e Venezolano, cu na 2024 mester vota pa Nicolas Maduro por keda presidente of pa e bay cas.
Ta ora Nicolas Maduro bay cas, frontera di Venezuela ta habri pa tur e Venezolanonan cu el a pone bandona nan pais cu menasa di morto y destruccion riba nan cabez.
