Sue-Ann Ras, Lider Proyecto Codigo di Proteccion:
*Tin 'tools' cu mayornan por y mester uza
ORANJESTAD (AAN) – E lider di e Proyecto Codigo di Proteccion, señora Sue-Ann Ras, tabata presente den e conferencia di prensa di gobierno, Diaranzon 12 di Juni.
El a splica cu pa e Ley Kinderopvang drenta na vigor, en realidad tabata crucial cu cierto LBHAM tabata na su lugar. Un di nan tabata e asunto di keho. Con nos ta anda cu keho.
“Pues, mester a traha un proceso interno y un proceso externo, pero tambe mester tabata tin con nos ta bay na momento cu nos haya e keho. Esaki ta locual a tuma lugar den e caso specifico, e kehonan a drenta. Manera mi a bisa e kehonan no mester a drenta via facebook, mester drenta na e departamento. Haci uso di e departamento, entrega bo keho”, Ras a indica.
El a sigui bisa cu na momento cu un keho wordo entrega, nan ta wak di biaha riba ki aspecto e ta. “Nos ta haci locual nos tin cu haci a base di nos maneho, nos ta ehecuta esey y unda nos tin cu schakel aden, den e caso aki nos a schakel na JZP, y nan a haci nan trabao. Kiermen, e keho cu a entrega a cana su caminda debido, pa nos haci locual nos mester a haci”, Sue-Ann Ras a señala.
El a subraya tambe, cu como mayor esaki ta e parti di mas importante aworaki tambe; mayor y nan tur tin un responsabilidad.
“Como mayor, nos tin cierto tools cu nos mester haci uso di nan. Manera cu Minister a indica na comienzo, bo tambe por haci uso di tools, haci pregunta, cuanto mucha bo tin, kico boso ta haci den caso di emergencia, unda boso ta bay procesa tambe, ken bo ta yama, kico nos como mayor por nifica pa eigenlijk, fortalece y empodera e crèche”, Sue-Ann a subraya.
Ras a señala cu un crèche no ta algo cu mayor ta baha su yiu eynan, di biaha bo a coi bo caminda bay, y despues bin busca bo yiu bek pasobra bo nunca no tin tempo pa combersa. “Tuma tempo, ta envolvi den e proceso di locual cu ta sosode di bo yiu, for di mainta of atardi cu bo ta lague, of merdia cu bo busk’e”, Sue-Ann Ras a manifesta.
El a bisa na mayornan pa comunica cu e crèche, puntra con su yiu ta bay den dia. “Abo, como mayor, tin tur e derecho pa sa kico tur lo bo por puntra si of no”, el a acentua.
Tambe mayor por puntra kico e plan pedagogico di e crèche ta, kico ta nan vision, kico ta nan maneho, si tin un keho cerca ken mester entrega esaki, distingui bo keho personal cu profesional. “No ta pasobra mi tin un keho, por ehemplo, con bo ta anda cu desaroyo di mi yiu esey no kiermen cu personalmente mi no ta gusta bo. No, e ta gewoon, mi tin preocupacion, mi kier wak di con mi yiu ta yora constantemente, anto mi kier combersa cu bo, kico nos por haci” Sue-Ann a subraya. El a acentua cu un bon comunicacion habri, pero semper cu respet.
