Director Gino Goeloe:
ORANJESTAD (AAN): E ta algo cu recien por a mira ta wordo discuti na Merca, caminda muchanan casi no por skirbi drechi na scol, no por papia drechi, y tin problema cu idioma.
Pero awor, e rapport nobo treci door di Wit Gele Kruis Aruba, ta trece un preocupacion cu na Aruba tambe tin algo similar ta pasando.
Esaki ta loke Gino Goeloe, kende ta director di Wit Gele Kruis Aruba a confirma na DIARIO.
E ta referi na e rapport di “Ouder- en Kindzorg” di nan mes, y loke ta ser treci dilanti den dje, ta cu tin hopi problema cu muchanan na Aruba den ‘Taal en Spraak’ (lenguahe y papia).
‘Taal en Spraak’ ta unda cu e mucha tin di desaroya su lenguahe, y ta mirando cu tin basta problema cu e forma di papia. WGK Aruba di algun aña pasa caba a duna di conoce nan preocupacion cu esaki ta bay empeora. Y semper nan a boga pe, pa hunto cu FEPO pa bin cu Logopedistanan, unda mayornan por wordo yuda door di AZV door di Logopedista.
“Pesey awor mi kier a bisa danki na AZV, cu awor Logopedista por ricibi verwijsbrief di Docter pa nan yiunan, unda por duna un yudansa den e parte di lenguahe, “Taal en Spraak”, cu ta algo bunita pa nos muchanan.
Esaki ta e parti unda Goeloe ta para keto, y en general ta mira cu e oido di muchanan ta bon, unicamente a ripara cu ora di test muchanan, tin awor tiki mas mucho cu a sali di observacion negativo. Despues ora di haci otro test, esaki ta sali positivo.
Pero toch nan ta mira cu cifra, cu tin un aumento chikito di e parti di oido di muchanan. Toch WGK Aruba hunto cu Fundacion FEPO tin un bon team hunto cu demas partnernan, cu ta vigila e caso aki, unda tur mucha cu tin un defecto di oido ta wordo yuda inmediatamente.
Nota di Redaccion: Den pasado DIARIO a nota un informe publica den exterior, caminda ta adverti mayornan cu ta cumpra headphone pa nan yiunan usa cu nan Tablet Computers for di edad hoben. Nan por hisa e volume asina halto, sin ripara, y esaki por ocasiona problema di oido pa nan, y corda cu e por ta permanente.
