Presidente di Fundacion Alzheimer Aruba drs. Melva Croes:
ORANJESTAD (AAN) – E presidente di Fundacion Alzheimer Aruba (FAA), den entrevista cu DIARIO a duna di conoce cu durante e luna di Juni aki, FAA ta bay pisa, pisa riba e aspecto huridico, encuanto abuso di adulto mayor. Y den esaki diasabra 15, lo tin e charla en conexion cu Dia Mundial di Concientizacion contra Abuso di Adulto.
Ta bay tin participacion di un abogado renombra na Aruba (no ta bay publica su nomber ainda), kende ta bay elabora riba e aspecto huridico cu ta regarda abuso contra adulto mayor.
Tambe lo bay tin un docter cu tambe ta bay papia tocante problemanan cu ta sosode cu, por ehemplo, pashentnan cu ta bay docter ken ta bisa nan cu nan tin un malesa, y tin biaha e pashent ta bin cu un persona hunto cu nan. E keho cu FAA ta haya hopi, ta cu algun docter (no ta tur), ora e pashent drenta mesora ta cuminza papia cu e yiu of e persona cu ta bin hunto cu e pashent, ken ta para eynan pero no ta compronde nada kico e docter ta papia, pasobra nada na wordo dirigi na dje. Esey tambe ta un parti di e forma di abuso, Melba Croes a señala.
Drs. Croes a reitera cu tambe lo tin un docter cu ta bay papia tocante abuso na adulto mayor, y su efectonan. Y tambe a reitera e charla di mr. Lili Marval.
“Mi mesun persona lo elabora riba e estado cognitive di un persona ora e ta bao di stress. Tambe tin un cantidad di abusonan cu por y cu ta, tuma lugar. Algo cu a resalta e lunanan cu a pasa cu mi a experiencia den literatura, ta algo impactante tocante abusonan cu ta tumando lugar, tin diferente rapportnan cu a sali tocante esey, internacionalmente, tocante di con hendenan no ta raporta y pakico e investigacion t’asina abao, den e parti di abuso di adultonan mayor”, Melva Croes a bisa.
El a splica cu esey tin di haber cu e parti di cultura cu e personanan ta aden. “Hopi biaha un adulto mayor no ta conciente tampoco, cu un abuso a tuma lugar. Aki na Aruba tambe bo ta mira e parti di ‘edadismo’, y e parti di discriminacion di hende grandi cu, eigenlijk, tambe ta un abuso”, el a relata.
