Parlamentario Eduard Pieters di PPA:
- E kier sa pakico e castigonan no ta refleha gravedad di e daño
ORANJESTAD (AAN): Un sentencia tin un fecha cu e ta termina. Pero trauma di un mucha abusa sexualmente por sigui cu ne pa resto di su bida. Pa parlamentario Eduard Pieters (PPA), precisamente ey Aruba mester tin curashi pa haci un pregunta dificil: “Nos sistema penal ta refleha suficientemente gravedad y consecuencia di abuso sexual contra mucha?”
E fraccion di PPA a inicia un serie di reunion cu e organisacionnan y e profesionalnan, cu ta traha riba proteccion y educacion di mucha. Segun Pieters, e iniciativa ta sigui despues di e combersacionnan cu varios mayor preocupa, incluyendo e mayornan di e muchanan cu ta victima di abuso sexual.
E meta no ta solamente papia: PPA kier wak unda e sistema ta funciona, unda e ta faya y con leu Aruba por bay legalmente pa proteha mucha y castiga malhechor. “Nos no ta mira suficiente cambio efectivo y realmente na proteccion di nos muchanan.”
Pieters a indica cu experiencia di mas di 20 aña den politica y Gobierno di lider di PPA, Otmar Oduber, combina cu relato di e famianan y informacion for di e organisacionnan, a indica cu ta necesario un discusion hopi mas contundente.
“Ta basta!” Segun Pieters, Aruba no por normalisa un situacion, caminda un victima por carga consecuencia psicologico y emocional pa añanan, mientras sociedad ta considera e caso cera, ora sentencia penal termina. P’esey PPA kier pone riba mesa un propuesta cu Pieters mes ta reconoce cu lo por genera debate: investiga posibilidad di cadena perpetua, levenslange gevangenisstraf, den e casonan di abuso sexual grave contra mucha.
Un señal na malhechor, pero tambe na victima: Pa Pieters, e propuesta tin dos mensahe. E prome ta pa e potencial malhechor: abuso sexual di un mucha ta algo grave y bo lo bay cera practicamente pa resto di bo bida, pues NO mas abuso sexual contra mucha. Pero e di dos mensahe ta igualmente importante. Ta pa e mucha y famia cu ta afecta:
sociedad ta reconoce gravedad di loke a pasa cu bo y e malhechor no lo ta cerca di ningun mucha mas.
PPA ta consciente cu un cambio asina ta exigi analisis huridico serio, proporcionalidad y debate democratico. P’esey e reunionnan cu e organisacionnan ta importante, prome cu formula legislacion concreto.
Castigo solamente tampoco ta suficiente! E discusion, sinembargo, no por termina cu cantidad di aña den prison. E reunionnan mester identifica tambe unda mester fortalece e sistema di prevencion, deteccion, denuncia, investigacion, proteccion y acompañamento di victima. Pasobra e victoria mas grandi no ta solamente pa castiga un abusador despues cu el a comete e crimen, sino pa evita tur cu ta posibel pa un mucha bira victima.
Finalmente Eduard Pieters ta decidido cu PPA kier cambia e tono di e debate. “Nos no lo drumi ni sosega, mientras nos muchanan ta wordo abusa. Si e daño cu bo causa na un mucha por sigui pa resto di su bida, Aruba mester tene e debate serio tocante con severo consecuencia pa e malhechor mester ta.” Pa PPA, proteccion di mucha no por keda na palabra, conscientisacion superficial of un maneho/conseho bunita skirbi pero no ehecuta. E mester ta mira den prevencion, den sosten pa victima y den consecuencia pa esun cu destrui inocencia di un mucha
