Herrick Henriquez, director di ATIA:
ORANJESTAD (AAN) – Herrick Henriquez, director di Asociacion di Industria y Comercio di Aruba (ATIA), a yama un conferencia di prensa den cual el a referi na e areglo di fianza cu a wordo firma e siman aki, door di Gobierno di Aruba cu Hulanda, na un porcentahe di 6.9%.
“Nos a bin ta informa pueblo, basta tempo caba, via un par di comunicado di prensa y conferencia di prensa, ki e cifranan ta, cuanto esaki lo costa Aruba si no a firma e acuerdo na 3.1%, despues a papia di 5.1%, 6.1% y awo nos por a mira cu riba dia 10-10-23 Gobierno a firma, 5 minuut prome cu e deadline, na 6.9%”.
Henriquez a splica kico esaki ta bay nifica pa pueblo di Aruba. Den pasado ATIA a presenta cifranan cu nan a caba di update. E cifranan cu Minister Presidente a menciona den conferencia di prensa e siman aki, e fianza di Covid (ban yame asina), tabata 916 miyon florin. “Si nos wak e 6.9% nos ta wak cu e pago pa aña ta rond di 86 miyon y e interes pa aña ta ongeveer 63 miyon. E fianza ta pa 20 aña y interesante ta pa aña, mas of menos, 63 miyon. Loke nan a splica tambe ta cu e ta un ‘annuitaire lening’ ta mescos cu un fianza pa cas. Dus, na cuminzamento bo ta paga hopi mas interes y na final menos interes”, Henriquez a señala.
Tambe ta interesante, el a agrega, cu si e fianza a wordo firma na 3,1% ta papia di un pago di 62 miyon y un interes di 28 miyon pa aña. “Pues, e diferencia ey caba ta di cinco miyon pa aña. Pues, e 3.8% cu ta e diferencia cu tin, ta mas of menos 35 miyon florin pa aña. Kico esaki kiermen? Henriquez a indica cu esaki ta e di dos parti cu ta un “breakdown” di interes so. Kiermen, na 3.1% bo tin un interes di 28 miyon; 5.1% tin un interes di 46 miyon y 6.9% tin un interes di 63 miyon pa aña. Aki por wak cu e diferencia entre 5.1% cu 3.1% ta 18 miyon y esun di mas grandi cu ta 6.9% cu e 5.1%, e diferencia ta 16 miyon cu ta loke Minister Presidente a papia den su conferencia di prensa.
Director di ATIA a señala cu tur esaki ta hopi cifra, pero hopi placa tambe, y kico su nificacion ta. “Esaki mi ta kere nos no por wak’e pero nos ta bay present’e na prensa, si. Importante ta, cu e fianza den 20 aña ta bay costa nos 1.7 billion florin, dus 1.715 miyon florin, pa paga bek un fianza di 916 miyon florin!”, Director di ATA Herrick Henriquez a remarca.
