Prome Ministro Evelyn Wever-Croes:
- Hunto ta logra trece progreso y bienestar pa comunidad
- Gobernador a refleha riba tur loke ta biba den pueblo
ORANJESTAD (AAN): Diamars mainta, 12 di September, a tuma luga e apertura di Aña Parlamentario 2023-2024. Na Parlamento, a tuma luga e ceremonia na unda Gobernador di Aruba, Alfonso Boekhoudt a declara e aña Parlamentario habri. Esaki ta e di 38 Aña Parlamentario di Pais Aruba y e ta un momento hopi solemne pa e organo di mas importante di Pais Aruba.
Prome Minister Evelyn Wever-Croes a expresa cu Gobernador a duna un discurso balansa na unda cu Gobernador a refleha riba tur loke ta biba den nos comunidad.
Gobernador a enfatisa cu apesar cu Aruba ta den recuperacion, keto bay Aruba tin retonan y ta solamente trahando hunto y cu e meta central di hiba nos pais dilanti, nos lo crea un futuro miho y mas sostenibel.
“Aruba ta den recuperacion, pero nos no ta ainda unda nos mester ta. Nos kier pa tur hende sinti e progreso y bienestar cu Gobierno di Aruba kier trece pa Aruba. Esaki Gobernador a elabora hopi balansa riba cada area di maneho den gobernacion”, Prome Minister a expresa,
Prome Minister a remarca cu ta premira un aña Parlamentario nobo sumamente fructifero y positivo pa Aruba. Un aña na unda cu tin decisionnan importante cu mester tuma riba tereno financiero y negosacion cu Hulanda. Tin hopi ley den proceso pa worde trata den Parlamento sperando e sosten di Parlamento. Pero esaki ta tambe e aña na unda cu proyectonan mester worde concretisa y den esaki Parlamento ta parti hopi importante.
“Mi ta desea tur parlamentario hopi exito y sabiduria y tambe hopi pasenshi den e aña Parlamentario aki. Manera Presidente di Parlamento, Edgard Vrolijk tambe a menciona, ta den sala di Parlamento e decisionnan grandi pa nos pais ta worde tuma. Mas uni nos ta, mas nos ta logra pa nos pais. Den nomber di Gobierno di Aruba, mi ta desea tur Parlamentario un bon y fructifero Aña Parlamentario 2023-2024. Hunto, Gobierno di Aruba, Parlamento di Aruba y pueblo di Aruba, ta logra trece progreso y bienestar pa henter nos comunidad”, Prome Minister Evelyn Wever-Croes a expresa.
