Parti di uno di e sectornan economico central den Cambio di Clima --*Mundo ta premia vision di hotelero Ewald Biemans pa turismo y clima --*Bucuti & Tara Resort a proba cu sector turistico responsabel ta posibel
ORANJESTAD (AAN) — Mientras mundo ta recupera di e pandemia Covid-19, DIARIO na forma constante a trece dilanti cu recuperacion economico di e pais y di mundo, mester ta den cuadro di e conservacion di mundo cu ta wordo menasa pa cambio di clima.
Manera DIARIO a ilustra, Aruba ta uno di e paisnan cu sigur mester tene e peligro natural eminente na bista debi na propio naturalesa di Aruba como isla chikito den un lama cu ta menasa tera den futuro pero tambe teniendo cuenta cu Aruba pa un gran parti ta depende di turismo, cu ta depende di naturalesa pero tambe na hopi parti di mundo, a destrui naturalesa.
Mayoria di hende ta mira industrialisacion como peliger na mundo, pero ta lubida con e mal planificacion di turismo den demasiado caso tambe a afecta naturalesa, medio ambiente y hende.
Pa Aruba un momento historico ta bati na porta, ora e conocido hotelero Ewald Biemans lo worde honra mundialmente como presentado na e Conference of Parties 26 na Glasgow, caminda su vision hancra den Bucuti & Tara Resort lo ricibi e premio Global UN 2020 Action Award for Climate Neutral.
E premio aki mester sostene e lucha di hende contra cambionan di clima, cu lo destrui bienestar di hende cu cambionan desastroso, cu ya mundo ta experencia den entre otro horcanan mas peligroso, menasa di clima, peliger pa e futuro di mundo.
Siendo e cambio di clima e topico principal cu mester tene hende ocupa den nos mundo actualmente, awe sigur mester presta atencion na e logro grandi di uno di e hoteleronan cu tabata parti di e desaroyo di sector hotelero di Aruba.
Ewald Biemans nace na 1945 na Austria y como hoben a habri su caminda den mundo hotelero na Europa y America Latino.
Como turista el a bishita Aruba cu e tempo ainda no a conoce e crecemento explosivo di turismo for di 1986, cu a nifica un cremento economico pa Aruba despues di salida di Lago pero tambe peligernan grandi cu entrada cu no ta wordo bon guia y controla den turismo, ta representa pa un pueblo na diferente forma y sigur riba tereno di medio ambiente.
Despues di e gradua den International Business na Florida State University, Ewald Biemans a bolbe Aruba, caminda ya turismo a cuminsa afecta naturalesa na Aruba.
Na mometo cu Ewald Biemans a introduci su proyecto y concepto futuristico di turismo na Aruba na 1987, el a implementa su concepto pa preserva naturalesa cu el a mantene.
E base di Bucuti & Tara Resort a keda e realisacion di un proyecto hotelero den cual preservacion di naturalesa tabata central mientras mundo ya tabata conciente di e peliger di cambio di clima.
Awe e logro di un empresario di Aruba, ta wordo aplaudi pa mundo.
DIARIO ta presenta Ewald Biemans awe como un ehempel pa e comunidad di Aruba, cu mester enfrenta uno di e retonan historico mas importante cu ta cambio di clima.
Awe personanan manera Ewald Biemans mester ta inspiracion sigur pa Aruba, cu pa por sobrevivi riba tereno social, economico y financiero mester percura pa sobrevivencia den un naturalesa cu mester di sosten di tur hende pa por enfrenta y gana e bataya contra e cambionan den clima cu ta enemigo di futuro di hende!
