Demanda grandi pa informacion ta pusha un di cinco anochi di ‘Real Estate den Bario’ na Santa Cruz

ORANJESTAD (AAN) – Durante ultimo cuater siman a keda manifesta e interes y participacion grandi di pueblo Arubano den e serie di sesionnan informativo titula Real Estate den Bario.

            E sesionnan cu a tuma lugar na Paradera, Noord, Dakota y San Nicolas a resulta den un intercambio amplio di informacion, pregunta y claridad riba tema importante herencia, compra y benta di propiedad.

            Asistencia a supera e expectativanan, loke ta confirma e necesidad urgente pa informacion den e area aki. Como respuesta na e demanda popular, a añadi un sesion adicional pa e siman aki na Santa Cruz.

E iniciativa Real Estate den Bario ta un esfuerso conhunto entre ID Realty Group Aruba y varios oficina di notario, despues di a nota e gran falta di conocemento riba asuntonan legal y practico rond di real estate, specialmente den un mercado cu ta pasando den un fase asina dinamico.

            E prome temporada di sesion a concentra riba tema di herencia y e cambio den codigo civil tocante esey. Pa luna di september, un segundo temporada ta den preparacion, cu enfoke riba ROPV y regulacionnan importante pa esunnan cu ta considera pa pone nan propiedad den mercado di vacation rental.

            E sesion pa publico en general na Santa Cruz lo tuma luga e diahuebs awo, 10 di juli na MFA Santa Cruz di 7:30 anochi pa 9:30 anochi, cu participacion di Notaris Johnson y representante di FCCA. Ta yama tur interesado bon bini haya e informacion cu por yuda bo tuma decision informa den mundo di real estate.