Aworaki tin convenio cu EPB pero intencion ta pa traha hunto cu diferente scol y instancianan

Directora di Reclassering Seraida Pemberton:

• Trayecto Halt ta mustra cu hobennan tin hopi problema cu exigi traha den colaboracion 

ORANJESTAD (AAN) Seraida Pemberton, Director di Reclassering, den entrevista cu DIARIO a señala cu netamente ora na a takel e Trayecto Halt Aruba, Reclassering a ripara cu nos hobennan tin hopi problema. Problemanan manera droga, no bay scol, problema na cas cu mayornan, pues nan ta wak tur esey (un combinacion di factor).

   “Pero Reclassering no ta e solucion cu nos ta bay los tur e problema. Nos a bin ta señalando tur eseynan, y pesey nos kier traha hunto cu Sociale Zaken, Stichting Hunto y diferente departamento pa nos por enfrenta (‘pak aan’) esaki prome cu e sigui bay den mal caminda.”

   “Aworaki, nos tin por ehemplo convenio cu EPB y diferente scol pa nos por bay traha mas hunto, pa nos trata e problema aki. E no ta un problema cu ta wordo soluciona den un-dos-tres, e ta exigi un colaboracion, entre diferente instancia hunto pa takel e problema aki”, señora Pemberton a indica.

Pemberton a agrega cu nan a cuminza pa haci e protocol di colaboracion (“samenwerking protocol”) cu nan, anto e tin cu aplaudi cu esaki ta tumando lugar, y nan ta bay sigui cu otro scolnan tambe.

   “Mi a menciona EPB pasobra eynan nos a cuminza, pero e intencion ta pa sigui na e diferente scolnan”, el a reitera.

  E preocupacion no ta solamente e cifranan pero e tipo di delitonan cu ta wordo cometi bao di nos hobennan, loke ta hopi alarmante. “Ta delitonan cu antes tabata wordo cometi pa hende grandi, awo nos ta haya bao di e hobennan, y e edad tambe, cu ta bahando ta preocupa over di esey. E Halt ta bay te cu 12 aña pero bo ta haya hobennan d 10-11 aña ta haya nan mes den e problemanan aki”, Seraida Pemberton a relata.

   El a bolbe reitera cu tin cosnan cu Reclassering ta señalando cu ta preocupa nan, cu ta exigi pa e diferente departamentonan traha hunto.

   “Ora nos ta señalando e diferente problematica bao di nos hobennan, nos no ta bisa cu ta un cos so, pero ta un combinacion. Corda cu un combinacion di problemanan ta haci un hoben instabil.  Nos no a haci e inventarizacion di e Halt ainda, pero bao di e hobennan cu a yega na reclassering nos ta wak presion di grupo, dus amistadnan, nan ta hopi influenciabel, nan tin problemanan na cas, pues e combinacion di factornan ta hunga un rol”, Directora di Reclassering, Seraida Pemberton-Leonard, a señala.