Ronella Croes di ATA a divulga --- ORANJESTAD (AAN): Diahuebs mainta durante conferencia di prensa convoca pa DOW pa anuncia finalizacion di Fase 1 di e Renobacion di Beachnan,
a tuma nota cu CEO di Aruba Tourism Authority, esta Ronella Croes a bisa cu den 2022 hunto cu Ministerio di Turismo, lo bay sigui pone atencion pa mas area na Aruba cu mester di upgrading.
El a splica cu lo duna turno na e.o. Baby Beach, Rogers Beach, y tambe e area di Bushiri Beach lo haya atencion den 2022.
Un aspecto cu nan a bin ta inverti den dje ultimo añanan ta pa pone toter (baki) di sushi den diferente area di beachnan, y tambe e coleccion di e desperdicio cu ta wordo genera.
Diahuebs mainta a informa di un aspecto hopi importante y nobo den e contexto aki. A lanza un colaboracion cu ‘Metabolic Foundation’ cu ta conoci tambe como Plastic Beach Party. E fundacion aki a bin ta haci trabao fabuloso riba tereno di reciclahe, re-uso y reduccion di desperdicio.
Esaki ta netamente loke kier sigui enfoca riba dje, y hunto cu nan duna mas realce na e aspecto aki tambe.
E recogimento di sushedad y tambe e forma cu ta bay organiza esaki lo bay cambia. Lo bay pone e toternan di sushi aki den diferente area di beachnan na Aruba. Tur sushi en general lo bay EcoTech, y sushi den forma di aluminio y hero cu lo bay Daltra NV. Tur sushi cu ta di plastic, cu ta como 200 kg pa luna lo wordo recicla y e resto lo bay EcoTech. Finalmente lo haci distincion di boternan cu ta wordo colecta como desperdicio. E boternan aki lo wordo recicla pa medio di Palmera Quality Products (PQP) y uno mas.
Segun Ronella Croes, esaki ta un proyecto sumamente bunita, y ta un placer pa lanza esaki.
E intencion ta pa duna chens na sector priva pa uni su mes na un tipo di esfuerzo asina. Pues pronto lo por ta lanzando un ‘Adopt-a-Trash-Can” program pa asina sector priva tambe por haci su mes responsable pa un di e toternan di sushi aki.
“E no ta bay pa e bari di sushi, sino un maneho di desperdicio responsable y principalmente den area di beachnan,” Croes a bisa.
E ta pidi pueblo pa haci bon uso di e utilidad aki cu nan ta provee y yuda cuida beachnan cu ta un di Aruba su patrimonio principal sin lubida un di e aspectonan principal den promocion di Aruba y den atraccion di e isla pa bishitantenan y pa turismo basicamente cu ta e pilar economico.
No ta solamente ATA ta bay inverti den esaki. Ronella tabata mustra un monton di toter di sushi cu ta cla pa wordo instala, y el a splica cu ta hayando sosten tambe di Tourism Product Enhancement Fund cu ta bay carga responsabilidad pa 10 toter di sushi, ATA ta bay carga responsabilidad pa 10 toter, y AHATA lo pone 2 toter tambe.
Esakinan lo bay complementa loke Serlimar tin instala tambe caba.
