Debby van de Seyp-Warner ta un di e motornan na LabHOH

El a wordo scogi como empleado di luna na Hospital ---  ORANJESTAD  (AAN): Recientemente Dr. Horacio E. Oduber Hospital a saca su empleado di luna di november.

E empleado aki ta un di e motornan na LabHOH, esta Debby van de Seyp-Warner. Debby ta un persona cu semper t’ey y ta bay e extra miya pa yuda tur su coleganan.

            No tabata mucho tempo cu a pone un borchi den sala di reunion y Debby a ten’e dilanti dje cu e pensamento esey nunca lo pas’e. Pero e coleganan a bini hunto pa asina demonstra nan aprecio pa tur loke Debby ta haci y sorprend’e como empleado di luna.

            Pa Debby esaki tabata un bunita sorpresa. E tabata tin su “funtioneringsgesprek” y a trece su puntonan pa dilanti, mirando cu tabata tin un aña basta pisa tras di lomba na laboratorio. Tur a pone nan man nan na obra p’e trabou por sigui bay. Y den mesun rosea e la bisa su hefe cu lo ta bunita pa demostra aprecio y den menos di algun ora e la wordo sorprendi cu e nominacion aki.

            Un colega a duna di conoce cu Debby ta un trahado excepcional na LabHOH. Semper e ta cla pa yuda su coleganan y kico cu pidi su persona, e ta hacie cu mil amor. E ta un trahado integro, e ta cla pa yuda na cualkier momento y e ta un persona hopi alegre. “E ta e zonnetje in huis”, e colega a duna di conoce. Den su caso e ta haya Debby hopi amabel p’e sosten incondicional semper, esey ta hacie un persona hopi special. Tambe como trahado organisacion tin hopi na dje den su funcion como secretaria. Masha pabien Debby y keep it up!